हेटौंडा/ हेटौंडा उपमहानगरपालिका १० नम्बर वडा बाल मैत्री स्थानीय शासन युक्त वडा घोषणा हुदैँ छ । सोमबार उक्त वडा कार्यलयले पत्रकार सम्मेलनको आयोजना गर्दै बाल मैत्री घोषणा गरिने सम्बन्धमा जानकारी दिएको हो ।
बालबालिकामा लगानी , सुनिश्चित भविष्यको थालनी भन्ने मुल नाराका साथ भदौ ८ गते शनिबार बाल मैत्री घोषणा गरिने जनाएको छ । वडालाई निकृष्ट बालश्रम मुक्त, बाल विवाह मुक्त तथा बाल मैत्री स्थानीय शासन युक्त वडा घोषणा गरिने १० नम्बर वडा अध्यक्ष फुर्वा दोर्जे लामाले बताए । वडाले स्थानीय शासन अभियान सञ्चालन गरी विभिन्न चरण पार गरी घोषणाको तयारी गरिरहेको अध्यक्ष लामाले जानकारी दिए ।
बाल मैत्री स्थानीय शासन घोषणा गर्न ५१ वटा सुचकहरुमा अभ्यास गरी ४९ वटामा सुचकहरु १०० प्रतिशत, १ वटा सुचक ९५ प्रतिशत, १ वटा सुचक ८१ प्रतिशत सम्म नतिजा हासिल गरेको बताएका छन् । उक्त वडामा घरधुरी तथ्याङ्क संकलन , २०७९ अनुसार ५२.६ प्रतिशत बालक र ८९९ बालिका रहेका छन् । यसै गरी सामुदायिक र संस्थागत गरी ४ वटा विद्यालय सञ्चालनमा रहेका छन् ।
