दक्षिण कोरिया/ दक्षिण कोरियाली राष्ट्रपति यून सुक योलले मंगलबार राति अचानक आयोजित पत्रकार सम्मेलनमार्फत “राष्ट्रविरोधी तत्वहरू“ विरुद्ध आपतकालीन मार्शल कानून घोषणा गरेका छन्।
“म उत्तर कोरियाली साम्यवादी शक्तिहरूको खतराबाट दक्षिण कोरियालाई जोगाउन, हाम्रो जनताको स्वतन्त्रता र खुसीलाई हरण गर्ने निर्दयी प्र–प्योङयाङ राष्ट्रविरोधी शक्तिहरूलाई तुरुन्तै समाप्त गर्न र स्वतन्त्र संवैधानिक व्यवस्थाको रक्षा गर्न मार्शल कानून घोषणा गर्दछु,“ राष्ट्रपति युनले सियोलको योंग्सान राष्ट्रपति कार्यालयमा आयोजित आपतकालीन पत्रकार सम्मेलनमा भने। “आपतकालीन मार्शल कानूनमार्फत हामी खस्किंदै गएको स्वतन्त्र दक्षिण कोरियालाई पुनः निर्माण र रक्षा गर्नेछौं।“ युनले यस्तो राष्ट्रविरोधी तत्वहरू र देशको पतनका दोषीलाई “जसले अहिलेसम्म दुष्कर्म गरेका छन्“ निर्मूल गर्ने प्रतिबद्धता जनाएका छन्। युनले यो कदमलाई “संविधान उल्टाउन खोज्ने राष्ट्रविरोधी तत्वहरूको कार्यविरुद्ध जनताको स्वतन्त्रता, सुरक्षा र राष्ट्रिय स्थायित्वको ग्यारेन्टी गर्ने“ “अनिवार्य“ उपायको रूपमा वर्णन गरे।
उनले थपे, “मार्शल कानूनको घोषणाले स्वतन्त्र मानिसहरूको संवैधानिक मूल्यहरूमा विश्वास गरी अनुसरण गरेका असल नागरिकहरूलाई केही असुविधा निम्त्याउन सक्छ, तर हामी यस्ता असुविधालाई कम गर्न केन्द्रित हुनेछौं।“ संभवतः अन्तर्राष्ट्रिय दृष्टिकोणलाई मध्यनजर गर्दै, युनले जोड दिए, “दक्षिण कोरियाको अन्तर्राष्ट्रिय समुदायमा आफ्नो जिम्मेवारी र योगदान पूरा गर्ने परराष्ट्र नीति अडानमा कुनै परिवर्तन भएको छैन।“ जनतालाई अपिल गर्दै उनले भने, “म स्वतन्त्र दक्षिण कोरियाको रक्षा गर्न मेरो जीवन समर्पित गर्नेछु, कृपया मलाई विश्वास गर्नुहोस्।“ युनले मार्शल कानून घोषणा गरेपछि, राष्ट्रिय रक्षा मन्त्रालयले सम्पूर्ण दक्षिण कोरियाली सैन्य बलका प्रमुख कमाण्डरहरूको बैठक आयोजित गरिएको र आपतकालीन तयारीलाई सुदृढ गर्न निर्देशनहरू जारी गरिएको घोषणा गर्यो।
