हेटौंडा/आगामी माघ २७ गते हेटौंडा–१०,स्थित टिसिएन चौरमा तामाङ साँस्कृतिक महोत्सव–२०८० हुने भएको छ । तामाङ समुदायको पर्व २८६० डुक (मु÷पुख्री) ल्हो सोनाम ल्होछारको अवसरमा तामाङ घेदुङ जिल्ला समन्वय समिति मकवानपुरले महोत्सव मनाउने भएको हो । घेदुङले पत्रकार भेटघाट कार्यक्रममार्फत् तामाङ समुदायको संस्कृति जगेर्ना गर्ने उद्देश्यले महोत्सव मनाउन लागेको जनाएको छ। पुरानो वर्षको १२ औं महिनाको पहिलो दिन अनौपचारिकरूपमा मनाइने उक्त पर्वमा तामाङ भेषभुषा झल्काउने पोशाकदेखि परिकारहरु प्रदर्शनमा राखिनेछ । यस्तै, लामा, बोम्बो, ताम्बाडम्फुरेसहितको ¥याली तथा झाँकी प्रदर्शनसमेत गरिने छ ।
महोत्सवमा तामाङ्ग कलाकार संघ मकवानपुरको समन्वय रहने छ। कार्यक्रममा शुभकामना आदानप्रदान तथा सम्मान, राष्ट्रिय तथा स्थानीय कलाकारहरुको प्रस्तुती रहनेछ जसमा सञ्जीव वाईबा, निमा पाख्रीन, जीवन बोम्जन, अविरम मोक्तान, धिरेन लामा, अनराज तामाङ, बिक्रम लुङ्बा, सुजना रुम्बालगायतको प्रस्तुतीहरु रहनेछन । यस्तै बिमला थिङ, साम्तेन मोक्तान, सोयल लामा, केशर मोक्तान, आशाराम थिङ, सुशिल थिङ, समीर थिङ र अस्मिता तितुङको पनि प्रस्तुती रहनेछ ।
महोत्सवमा ८ वटा स्टलहरु रहने, १० लाख रुपैयाँ खर्च हुने र करिव १० हजारले अवलोकन गर्ने अनुमान छ । घेदुङ, जिल्ला समन्वय समिति मकवानपुरका अध्यक्ष कालु घलानकाअनुसार उक्त महोत्सवले तामाङ समुदायको संस्कृति संरक्षण र सम्बर्धनमा सहयोग पुग्ने उनको भनाई छ । यस वर्ष तामाङ समुदाय र शेर्पा समुदायको ल्होछार एउटै दिन परेको घलानले जानकारी दिए । उक्त दिन तामाङ समुदायले सोनाम ल्होछार मनाउने छन् भने शेर्पा समुदायले ग्याल्पो ल्होछार मनाउने छन् ।
सोनाम ल्होछार हिमाली क्षेत्रमा बसोबास गर्ने तामाङ, ह्योल्मो तथा अन्य मुख्य जातिहरुको साझा पर्व हो । सोनाम ल्होछारमा किसानले बालिनाली उठाएपछि मनाइने पर्व पनि हो । तामाङ समुदायले पनि सोनाम ल्होछार नयाँ वर्षको आरम्भको रुपमा मनाउने पर्व हो । ल्होछार मनाउने समुदायले यस्ता ‘ल्हो’ अर्थात वर्ष १२ वटा भएको विश्वास गर्छन् । बाह्र वर्षको नाम पशुपंछी र जीवजन्तुका नामबाट राखिएको हुन्छ । जस्तैः मुसा, गाई, बाघ, बिरालो, गरुड, सर्प, घोडा, भेडा, बाँदर, चरा, कुकुर, सुँगुर वर्ष । यी बाह्र वर्गलाई यो समुदायले बाह्र राशिको रूपमा पनि लिने गरेको पाइन्छ र बाह्र वर्ष समाप्तपछि फेरि उही नाम दोहो¥याउने गरिन्छ ।
Advertisement
