मकवानपुर / मकवानपुर जिल्लाको राक्सिराङ गाउँपालिका–३ मा अवस्थित झिल्किनी गाउँ अहिले पर्यटकीय गन्तव्यको रूपमा पहिचान बनाउँदै गएको छ । झिल्किनीमा रहेको जलपरी झरना र चमेरो गुफा पछिल्लो समय आन्तरिक पर्यटकको आकर्षणको केन्द्र बनेका छन् ।
प्रदेश सरकार र राक्सिराङ गाउँपालिकाको संयुक्त लगानीमा झिल्किनी क्षेत्रको पर्यटन पूर्वाधार विकास भइरहेको छ । हालसम्म करिब १ करोड २३ लाख रुपैयाँको लगानीमा पार्क निर्माण सम्पन्न भएको छ। उक्त पार्कभित्र भगवान बुद्धको भव्य मूर्ति, जलपरीको कलात्मक शिल्प, र पर्यटकका लागि प्रतीक्षालय निर्माण गरिएको छ । पर्यटकलाई बस्न, घुम्न र विश्राम गर्न सहज वातावरण बनाउन आवश्यक संरचना विस्तार गरिएको छ । जलपरी झरनाको ठीक छेउमै रहेको चमेरो गुफा धार्मिक र प्राकृतिक दृष्टिकोणले झनै आकर्षक मानिन्छ। गुफाभित्र शिवको मूर्ति राखिएको छ भने सयौँ चमेराहरूको बास यही गुफामा पाइन्छ, जसले यसलाई रहस्यमय र आस्थामूलक गन्तव्य बनाएको छ ।
राक्सिराङ गाउँपालिकाले आफ्नो विभिन्न वडालाई विविध पर्यटकीय पहिचान दिने योजनामा काम गरिरहेको छ। मनहरी बजारबाट करिब ७ किलोमिटर माथि रहेको झिल्किनी क्षेत्रलाई प्राकृतिक, सांस्कृतिक र ऐतिहासिक दृष्टिकोणले पर्यटकीयस्थल बनाउने लक्ष्य लिइएको छ । गाउँपालिका उपाध्यक्ष बनस्तम थिङ का अनुसार, झिल्किनी क्षेत्रको संरक्षण र प्रवद्र्धनमा स्थानीय सरकार गम्भीरतापूर्वक लागेको छ । उहाँले भन्नुभयो “राक्सिराङ गाउँपालिकामा रहेका प्राकृतिक, धार्मिक र सांस्कृतिक स्थलहरूको संरक्षण गर्दै पर्यटकीय विकासमा अघि बढ्ने हाम्रो लक्ष्य हो । जलपरी झरना र चमेरो गुफालाई विशेष प्राथमिकतामा राखेर पूर्वाधार विस्तार गरिरहेका छौं । संरक्षण र प्रवद्र्धनमा स्थानीय सरकार प्रतिवद्ध छ। यस्ता प्रयासहरूले रोजगारी सिर्जनासँगै आन्तरिक पर्यटनलाई पनि टेवा पु¥याउनेछ भन्ने विश्वास लिएका छौं ।”
त्यसैगरी झिल्किनी नजिकैको सरिखेत–पलाशे क्षेत्रमा त्रिजट्टाको मूर्ति स्थापना गरिएको छ । यसले धार्मिक पर्यटकलाई समेत आकर्षित गर्ने अपेक्षा गरिएको छ । वडा नं। ५ मा प्रजा सङ्ग्रहालय निर्माणाधीन अवस्थामा रहेको छ भने वडा नं। ५ र ८ मा रहेको चेपाङ समुदायको परम्परा र सभ्यतालाई पर्यटकीय हिसाबले उजागर गर्न पहल भइरहेको छ । पत्रकार रामकुमार एलनका अनुसार, “स्थानीय संस्कृतिको संरक्षणसँगै पर्यटकीय प्रवर्द्धन गर्ने उद्देश्यले विभिन्न ठाउँमा पूर्वाधार निर्माण भइरहेको छ । यी प्रयासहरूले विकट मानिएको क्षेत्रलाई आन्तरिक तथा बाह्य पर्यटकको गन्तव्य बनाउने विश्वास गरिएको छ ।” अबको दिनमा सामुदायिक संलग्नता, सरकारी लगानी र प्रचारप्रसारको समन्वयबाट झिल्किनी क्षेत्र मकवानपुरकै प्रमुख पर्यटकीय गन्तव्यका रूपमा स्थापित हुने अपेक्षा गरिएको छ।
