शुभराज भोम्जन
दक्षिण कोरिया । सुदूरपश्चिम समाज दक्षिण कोरियाले आयोजना गरिएको दोश्रो खप्तड भलिबल कप २०२४ को फाइनल खेलमा विवाद सिर्जना भएको छ । उपाधिको लागि भिड्दै गरेको बाग्लुङ समाज र थेसो परिवारको खेलमा विवाद सिर्जना भएको थियो ।
नेपाल भलिबल संघ दक्षिण कोरियाको मातहतमा जुलाई १४ तारिख आइतबारका दिन सुवन स्थित आजु विश्वविद्यालयको भलिबल कोर्टमा सुदूर पश्चिम समाज दक्षिण कोरियाद्वारा आयोजित “दोस्रो खप्तड कप २०२४” भएको भलिबल फाइनल खेलमा विवाद उत्पन्न हुँदा हुदै पनि विवाद समाधान नगरी विपक्षी टिमलाई विजेता घोषणा गरेकोमा बाग्लुङ समाजले एक प्रेस विज्ञप्ति निकाली आपत्ति जनाएको छ। बाग्लुङ समाजले जारी गरिएको विज्ञप्तिको काउण्टरमा आयोजक संस्थाले विवादको वास्तविकता सम्बन्धी केही कारणहरू खुलाएर थेसो परिवारलाई विजयी घोषणा गर्नु स्वभाविक रहेको उल्लेख गरिएको छ ।
त्यसैगरी भलिबल संघ दक्षिण कोरियाले पनि एक विज्ञप्ति जारी गर्दै सबै प्राप्त अङ्कको आधारमा थेसो परिवारले लिड गरिरहेको अवस्थामा खेल रद्द हुँदा थेसो परिवारलाई नै विजयी घोषणा गर्ने सहमतिको आधारमानै विजयी घोषणा गरिएको जनाएको छ । बाग्लुङ समाजले भने प्रथम पटक विवाद हुँदा थेसो परिवारलाई मनग्य समय दिएको तर दोश्रो पटकको विवादमा थोरै समय आफूहरूले माग्दा समेत आयोजकले समय उपलब्ध नगराएको आरोप लगाएका छन् ।
विवादकै बिचमा विजेता घोषणा गरेकोले उप विजेता भए वापत प्राप्त गर्ने कुनैपनि पुरस्कारहरू नस्विकार्ने बाग्लुङ समाजले जनाएको छ । तर आयोजकले भने बाग्लुङ समाजलाई खेल खेल्नको लागि हदै सम्म आग्रह गर्दा पनि सहमतिमा आउन नमानेकोले प्राप्त अङ्कको आधारमा थेसो परिवारलाई विजेता घोषणा गरेको स्पष्ट पारेका छन् । दोश्रो खप्तड कप जिते संगै थेसो परिवारले बाग्लुङलाई पुनः एकपटक फाइनलमा हराएको छ । केही समय अघि सम्पन्न भएको एनसीसी रनिङ भलिबल कपमा पनि थेसोले बाग्लुङलाई उपाधि उचाल्नबाट बञ्चित गराएको थियो । बाग्लुङ समाजले भलिबलमा निरन्तर रुपमा थुप्रै प्रतियोगिताहरू विजयी हासिल गर्दै आइरहेको थियो ।
