दक्षिण कोरिया। नेपाल तामाङ घेदुङ, दक्षिण कोरियाको ख्याङसान बुसान शाखाले आयोजना गर्न लागेको बृहत् सोनाम ल्होछार साँस्कृतिक कार्यक्रमको तयारी तिव्र रुपमा भइरहेको संस्थाका अध्यक्ष सोम योञ्जन तामाङले जानकारी दिएका छन्।
तामाङ समुदायको प्रमुख पर्व तथा नेपालको राष्ट्रिय पर्वको रूपमा मनाइने मञ्जुश्री संवत् २८६१ (सर्प वर्ग) सोनाम ल्होछारको अवसरमा यो कार्यक्रम आयोजना गर्न लागिएको हो। जनवरी २९ तारिखका दिन आयोजना हुने कार्यक्रममा नेपालबाट ख्यातिप्राप्त कलाकारहरू सहभागी गराई कार्यक्रमलाई भव्य बनाउन लागिएको छ।
नेपालबाट आउने कलाकारहरूमा सेलो गायक विश्व दोङ, खान्दोके सेलो गायक आस्मान लोप्चन र गायक सुरेश लामाको उपस्थिति सुनिश्चित भइसकेको छ। यसका साथै, किम्हेमा आयोजना हुने कार्यक्रममा स्थानिय कलाकारहरूको पनि भव्य प्रस्तुति रहनेछ। कार्यक्रममा सहभागी हुन आयोजकले सबैलाई सार्वजनिक रूपमा आह्वान गरेका छन्।
