हेटौंडा/ नेपाली कांग्रेसको महाधिवेशन छिट्टै हुनुपर्ने कांग्रेस मकवानपुरका सभापति बुद्ध लामाले बताएका छन् । शनिबार हेटौंडा २ स्थित पार्टी कार्यालयमा पत्रकार सम्मेलनको आयोजना गर्दै नियमित वा विशेष महाधिवेशनमा नअल्झि पछिल्लो राजनीतिक परिवर्तनलाई सम्बोधन गर्ने गरी महाधिवेशन हुनुपर्ने सभापति लामाले बताएका हुन् ।
पार्टीले आफ्नो विधान अनुसार समयमै अधिवेशन गर्नेमा आफु विश्वस्त रहेको सभापति लामाले बताए । कम्युनिष्टसंगको संगतले कांग्रेस नियमित र विशेष अधिवेशनमा अल्झिन पुगेको उनको धारणा छ । एमाले र माओवादीसंग मिलेर सरकार बनाउँदा कांग्रेसलाई राजनीतिक रुपमा असर परेको उनले उल्लेख गरेका छन् । नेपाली कांग्रेसको ऐतिहासिक पृष्ठभुमिलाई जोगाइ राख्नपनि नियमित महाधिवेशन छिट्टै गर्नुपर्ने सभापति लामाले बताए । पत्रकार सम्मेलनमा कांग्रेस मकवानपुरका पूर्व सभापति माइकल रामचन्द्र अर्यालले विधानमा तोकिएको ४ वर्षमा महाधिवेशन हुँदैन भन्ने मानसिकता कांग्रेसजनमा रहेको बताएका छन् । ४८ सालपछि एउटा मात्र महाधिवेशन नियमित समयमा भएको उनले उल्लेख गरेका छन् ।
