उत्तर कोरियाका शासक किम जोग उन र रुसी राष्ट्रपति पुतीनका बिच १२ सेप्टेम्बर बिहान भेटवार्ता सम्पन्न भएको छ । नेता किम विशेष रेलमा चढी आज बिहानै रुसी सहर व्लादिवोस्तोक सहर पुगेका हुन् । सो रेलमा २० वटा बुलेट प्रुफ गाडीहरू पनि रहेको जानकारी हुन आएको छ ।
उत्तर कोरियाको हतियार र युद्ध सामग्रीसँग सम्बन्धित अफिसरहरू पनि सँगै यात्रामा रहेको जानकारी हुन आएको छ । सन् २०१९ पछि पहिलो पटक हुन लागेको यो वार्ताले दुवै देशको सम्बन्धमा सुधार हुने क्रिमलिनका प्रवक्ता डिमीट्री पेस्कोवले बताएका छन् ।
दुई देशको भेटवार्ता हतियार खरिदबिक्री हुनसक्ने भन्दै नाटोको लागि टाउको दुखाइको विषय बनेको छ । युक्रेन युद्धका कारण रुसलाई हतियार चाहिएको तथा उत्तर कोरियाले आफ्नो परमाणु क्षमतामा निखरता ल्याउन यो वार्ता भइरहेको अमेरिकी रक्षा मन्त्रालयको ठम्याई छ ।
विशेषज्ञहरूका अनुसार उत्तर कोरियासँग सोभियत डिजाइनमा आधारित लाखौँ तोप गोला र रकेट छ । यस प्रकारको भेटवार्ताले विगत १७ महिनादेखि चलिरहेको रुस युक्रेन युद्ध झनै प्रभावित हुने आकलन गरिँदै छ ।
