शुभराज भोम्जन
दक्षिण कोरिया । दक्षिण कोरियामा रहेका चितवन बासीहरुको साँझा संस्था चितवन सम्पर्क समिति दक्षिण कोरियाले अति बिपन्न तथा असहाय विद्यार्थीहरुलाई प्रदान गर्दै आएको छात्रवृत्ति अभियान अन्तर्गत ४२ जना विद्यार्थीहरुलाई छात्रवृत्ति वितरण गरिएको छ ।
समितिले २०७१ सालमा चितवन असहाय वालबालिका सहयोग अभियान सञ्चालनगरी दश जना विद्यार्थीहरुबाट सुरु गरेको उक्त अभियान बृद्धि भई हाल ४२ जना विद्यार्थीहरु समक्ष पुगेको हो । दक्षिण कोरियाबाट फर्किएका चितवन वासीहरुको साँझा संस्था चितवन कोरिया पुनर्मीलन समाजले उक्त अभियानको संयोजन गर्दै आइरहेको छ ।
चितवन कोरिया पुनर्मिलन समाजले व्यवस्थापन गर्दै आएको उक्त सहयोग अभियानले चितवनका ७ वटै स्थानिय तहमा प्रतिनिधि मुलक रुपमा सहयोग अभियान संचालन गर्दै आएको छ। गएको बिहिबार र सुक्रबारका दिन उक्त अभियान अन्तर्गत ७ वटै स्थानिय तहको २१ वटा विद्याहरुमा प्रतिनिधीमुलक ढंगले २÷२ जना अति विपन्न विद्यार्थीहरुलाई छात्रवृत्ति प्रदान गरिएको छ । चितवन सम्पर्क समितिले चितवन कोरिया पुनर्मिलन समाजको संयोजनमा सञ्चालन गरेको उक्त अभियान अन्तर्गत एक पटक छनौंटमा परेको विद्यार्थीले एसईई सम्मको लागि निरन्तर छात्रवृत्ति पाउने व्यवस्था रहेको छ ।
छात्रवृत्ति पाउने विद्यार्थीहलाई जनही पाँच हजार नगद र स्टेशनरी सामाग्रीहरु प्रदान गरिएको थियो । छात्रबृत्ति वितरण कार्यक्रममा चितवन सम्पर्क समिति दक्षिण कोरियाका अध्यक्ष राजकुमार स्याङतान स्वयमको उपस्थिती रहनुका साथै चितवन कोरिया पुनर्मिलन समाजका अध्यक्ष, सहयोग अभियानका संयोजक, अभिभावक, शिक्षक लगायतका थुप्रै सरोकारवाला ब्यक्तिहरुको उपस्थिती रहेको थियो ।
