शुभराज भोम्जन
दक्षिण कोरिया । नेपाली जनसम्पर्क समिति दक्षिण कोरियालेआयोजना गर्न लागिएको वृहत अन्तरक्रिया तथा प्रशिक्षण कार्यक्रममा भाग लिन नेपाली कांग्रेसका महामन्त्री गगन कुमार थापा, काँग्रेस संसदीय दलका प्रमुख सचेतक रमेश लेखक र पार्टीका केन्द्रीय सदस्य किरण पौडेल दक्षिण कोरिया आउने भएको छ ।
महामन्त्री थापाको प्रमुख आतिथ्यता रहने उक्त अन्तरकृया कार्यक्रममा विशेष अतिथिको रुपमा प्रमुख सचेतक रमेश लेखक र केन्द्रीय सदस्य किरण पौडेल समेत आउन लागेका हुन् । मे १९ तारिखमा जनसम्पर्क समिति दक्षिण कोरियाका सभापति भजिन्द्र क्षेत्रीको सभापतित्वमा बसेको कार्यसमिति र सल्लाहकारहरूको बैठकले जुलाई महिनाको २८ तारिख आइतबार कार्यक्रम गर्ने निर्णय गरेको हो ।
कार्यक्रममा अतिथिहरूले प्रवासमा रहेका नेपालीहरूको समस्या र गुनासोहरू सुन्नुका साथै नेपाली राजनीतिको वर्तमान अवस्थाको विषयमा प्रस्ट पार्ने जनाएको छ । सौलमा हुने उक्त अन्तरकृया कार्यक्रमको तयारी चलिरहेको सभापति भजिन्द्र क्षेत्रीले बताएका छन् । त्यसैगरी सभापति क्षेत्रीले अन्तरकृया कार्यक्रममा सहभागि हुनको लागि लाबा न्युज मार्फत आह्वान समेत गरेका छन् । कार्यक्रममा सहभागि हुनको लागि नेताहरू दक्षिण कोरिया आएको अवसरमा केही सांगठनिक कार्यहरू समेत गरिने जनाएको छ ।
