शुभराज भोम्जन
दक्षिण कोरिया । किरात याक्थुङ चुम्लुङ दक्षिण कोरिया द्धारा किराँतीहरूको सिरिजंगा लिपिको युनिकोड निर्माण गर्नको लागि किरात याक्थुङ चुम्लुङ संघीय परिषद काठमाण्डौलाई २७ लाख २ हजार ६ सय रुपैयाँ हस्तान्तरण गरेको छ ।
दक्षिण कोरियाबाट नेपाल पुगेका प्रतिनिधिहरू याक्थुङ चुम्लुङ छल्लादो शाखाका अध्यक्ष गणेश लिम्बू र सचिव भुपेन्द्र लिम्बुले संघीय परिषद अध्यक्ष प्रेम येक्तेनलाई संयुक्त रुपमा चेक हस्तान्तरण गरेका हुन् । चुम्लुङ दक्षिण कोरियाले केही समय अघि सिरिजंगा लिपिको युनिकोड निर्माणको उद्देश्य राखेर निर्देशक उपेन्द्र सुब्बाले निर्देशन गरेको नेपाली कथानक चलचित्र मनसरा दक्षिण कोरियाको बिभिन्न शहरहरूमा प्रदर्शन गरिएको थियो ।
सोही चलचित्र प्रदर्शनीबाट मुनाफा भएको कुल रकम हस्तान्तरण गरिएको हो । युनिकोड निर्माण गर्नको लागि २५ लाख रुपैयाँ भन्दा धेरै लाग्ने भएकोले सो खर्च जुटाउने जिम्मा दक्षिण कोरिया शाखाले लिएको र जिम्मा लिए बमोजिम सफलता मिलेकोमा आनन्द महसुस भएको किरात याक्थुङ चुम्लुङ दक्षिण कोरियाका अध्यक्ष दिर्ज काङ्भा लिम्बुले लाबान्युजलाई बताएका छन् । अध्यक्ष लिम्बुले आफ्नो समुदायको लिपिको संरक्षण, संवर्द्धन गर्नु सबैको दायित्व रहेको भन्दै सहयोगी हातहरुप्रति धन्यवाद व्यक्त गरेका छन् । त्यसैगरी संघीय परिषद अध्यक्ष प्रेम येक्तेनले सहयोग रकम ग्रहण गर्दै दक्षिण कोरिया शाखालाई धन्यवाद ज्ञापन गरेका छन् ।
