शुभराज भोम्जन
दक्षिण कोरिया । नेपाली सम्पर्क समिति दक्षिण कोरियाद्धारा आउदो छुसकको लागि कार्यक्रम बाँडफाँड प्रकृया सम्पन्न गरेको छ । एनसीसीले आइताबार सौलको दोङेमुन स्थित निक ट्राभलको सभाहलमा एक औपचारिक कार्यक्रमको आयोजना गरी कार्यक्रम बाँडफाँड सम्पन्न गरेको हो ।
यस वर्षको छुसकमा तिनवटा संस्थाहरुले कार्यक्रम गर्ने अधिकार पाएको छ जसमा लमजुङ परिवार दक्षिण कोरिया, कर्णाली प्रदेश समाज र नेपाल आदिवासी जनजाती महासंघको तर्फबाट शेर्पा संघ दक्षिण कोरियाले कार्यक्रम गर्ने अधिकार प्राप्त गरेको हो । जातीय संस्थाहरुको छाता संगठन नेपाल आदिवासी जनजाती महासंघ दक्षिण कोरियाले शेर्पा संघलाई कार्यक्रम गर्न दिएको अनुमतीलाइनै एनसीसीले आदिवासी जनजाती महासंघलाई समानान्तर मित्र संगठनको रुपमा स्वीकार गर्दै जनजाती महासंघको प्रस्तावलाई हुबहु अनुमोदन गरेको हो ।
लमजुङ परिवार, कर्णाली प्रदेश र शेर्पा संघ दक्षिण कोरियाले क्रमशः सेप्टेम्बर १५, १६ र १७ तारिखमा कार्यक्रम आयोजना गर्ने सहमती भएको छ । थुप्रै संस्थाहरु एनसीसी अन्तर्गत रहेर कार्यक्रम गर्न तयार भएता पनि पुर्वाञ्चल सरोकार समाज दक्षिण कोरियाले भने यस पटक पनि एनसीसी मार्फत कार्यक्रम लिएको छैन । पुर्वाञ्चल सरोकार समाजले भने आफ्नो स्वतन्त्र ढंगले पाँचथर सेवा समाज दक्षिण कोरियालाई सेप्टेम्बर १६ तारिखमा कार्यक्रम आयोजना गर्ने अधिकार दिइसकेको छ । एनसीसीको अध्यक्ष हरि प्रसाद खनालको अध्यक्षतामा भएको कार्यक्रममा एनसीसीको संरक्षक लोचन राईको प्रमुख आतिथ्यता रहनुका साथै थुप्रै संघ संस्थाहरुको अध्यक्ष एबम् प्रतिनिधिहरुको बाक्लो सहभागिता रहेको थियो ।
