दक्षिण कोरिया । नेपाल आदिवासी जनजाति महासंघ दक्षिण कोरियाको मुख्य आयोजनामा ३० औ विश्व आदिवासी दिवस समारोह भव्यताका साथ सम्पन्न भएको छ ।
आइतबार सौलको खुम्हो हाई स्कुलको सभाहलमा भएको समारोहमा दक्षिण कोरियामा क्रियाशील नेपालीहरूको बाक्लो सहभागितामा कार्यक्रम सम्पन्न भएको हो । ‘रैथाने ज्ञान, संस्कृति र परम्पराहरूको संरक्षण र प्रवर्द्धन आजको आवश्यकता, समानता सह अस्तित्व र पहिचान प्राप्तिको निम्ति आदिवासी जनजातिहरूको एकता’ भन्ने मुल नाराका साथ मनाइएको कार्यक्रममा महासंघमा आवद्ध बिभिन्न जातीय संस्थाहरुको तर्फबाट मौलिक खाना तथा मौलिक सांस्कृतिक झाँकी प्रदर्शनी गरेको थियो । समारोहमा सहभागि भएका लगभग ४ सय जनाको सङ्ख्याले विशुद्ध मौलिक रैथाने परिकारहरूको स्वाद चाखेको थियो ।
महासंघ दक्षिण कोरियाको अध्यक्ष विशन राईको अध्यक्षतामा भएको समारोहमा नेपाली राजदूतावास दक्षिण कोरियाको कार्यबहाक राजदूत पुस्पराज भट्टराईको प्रमुख आतिथ्यता रहनुका साथै दक्षिण कोरियामा क्रियाशील ४५ भन्दा धेरै संस्थाहरूको अध्यक्ष तथा प्रतिनिधिहरूको आतिथ्यता रहेको थियो । कार्यक्रम संयोजक शुभराज भोम्जनले आगन्तुक अतिथिहरूलाई स्वागत गर्नुका साथै विश्व आदिवासी दिवसको सन्दर्भमा केही प्रकाश पारेका थिए । कार्यक्रममा जेजु देखि बुसान सम्मको व्यक्तिहरूको सहभागिता रहेको थियो ।
