हेटौंडा/ सामाजिक एकता, धार्मिक सहिष्णुता र साम्प्रदायिक सद्भावलाई सुदृढ बनाउने उद्देश्यसहित शनिबार हेटौंडामा सद्भाव र्याली आयोजना गरिएको छ। जिल्ला प्रशासन कार्यालय मकवानपुर र सर्वधर्म समाज नेपालको संयुक्त आयोजनामा सम्पन्न र्यालीमा जनप्रतिनिधि, विभिन्न धर्मसँग आबद्ध संघसंस्था, सुरक्षा निकाय, राजनीतिक दल, स्थानीय तहका प्रतिनिधि, नागरिक समाज तथा सर्वसाधारणको उल्लेखनीय उपस्थिति रहेको थियो ।
हेटौंडा–४ स्थित हुप्रचौरबाट सुरु भएको र्याली शहरका मुख्य सडक हुँदै हेटौंडा–२ को संगमचोकमा पुगेर सभामा परिणत भएको थियो । सहभागीहरूले राष्ट्रिय एकता, धार्मिक सहिष्णुता र सामाजिक सद्भावको सन्देश दिने विभिन्न नारासहित शान्तिपूर्ण रूपमा र्याली सम्पन्न गरेका थिए । सभाको प्रारम्भमा सुनसरीको देवानगञ्ज गाउँपालिका–३, कप्तानगञ्ज तथा सिरहामा हालै भएका घटनामा ज्यान गुमाएकाहरूप्रति श्रद्धाञ्जलि अर्पण गर्दै एक मिनेट मौनधारण गरिएको थियो । कार्यक्रमलाई सम्बोधन गर्दै मकवानपुरका प्रमुख जिल्ला अधिकारी बसन्त अधिकारीले विविध धर्म, संस्कृति र समुदायबीच आपसी सम्मान तथा विश्वास कायम राख्नु नै समृद्ध समाज निर्माणको आधार भएको बताउनुभयो । उहाँले सामाजिक सद्भाव जोगाउन सबै नागरिकले जिम्मेवार भूमिका निर्वाह गर्नुपर्नेमा जोड दिँदै यस्ता कार्यक्रम आगामी दिनमा पनि निरन्तर सञ्चालन गरिने जानकारी दिनुभयो ।
सद्भाव सभामा प्रतिनिधिसभा सदस्य प्रकाश गौतम, जिल्ला समन्वय समिति मकवानपुरका प्रमुख ललित घलान, हेटौंडा उपमहानगरपालिकाकी नगर प्रमुख मिनाकुमारी लामा लगायत विभिन्न क्षेत्रका व्यक्तित्वहरूको सहभागिता रहेको थियो ।
