शुभराज भोम्जन
दक्षिण कोरिया । गैर आवासीय नेपाली संघ दक्षिण कोरियाको आइतबार वार्षिक साधारण सभा सम्पन्न भएको छ । आइतबार सौलमा भएको साधारणसभाबाट वार्षिक सांगठानिक प्रतिवेदन, भावी कार्ययोजना र आर्थिक प्रतिवेदन पास गरेका छन् ।
संस्थाको आयव्यय तर्फ कुल आम्दानी १५ करोड ६० लाख ९८ हजार ९ सय कोरियनबाट खर्च कटाएर अझै ८ करोड ५७ लाख ११ हजार ०२५ कोरियन वन बचत रहेको देखाइएको छ । संस्थाको सबैभन्दा ठुलो खर्च आईसीसी सदस्यता नवीकरण शुल्क, कर्मचारी व्यवस्थापन खर्च र कार्यक्रम खर्चमा भएको देखाइएको छ । त्यसैगरी ४७ लाख वन भन्दा धेरै रकम सदस्यता शुल्क फिर्ता शीर्षकमा पनि देखाइएको छ ।
गैर आवासीय नेपाली संघ दक्षिण कोरियाका अध्यक्ष बुद्धि गुरुङको अध्यक्षतामा भएको कार्यक्रममा नेपाली राजदूतावास दक्षिण कोरियाका कार्यावाहक राजदूत पुष्पराज भट्टराईको प्रमुख आतिथ्यता रहेको थियो । त्यसैगरी गैर आवासीय नेपाली संघका विभिन्न तहका अभियन्ताहरूको आतिथ्यता रहनुका साथै दक्षिण कोरियामा क्रियाशील सामाजिक तथा राजनीतिक संघ संस्थाहरुको अध्यक्ष एवं प्रतिनिधिहरूको आतिथ्यता रहेको थियो ।
