शुभराज भोम्जन
दक्षिण कोरिया । पाँच स दक्षिण कोरिया, गैर आवासीय नेपाली संघ दक्षिण कोरिया र आन्सन नगरपालिकाको मुख्य आयोजनामा भएको बृहत् दशैँ कार्यक्रम २०२४ को आय व्यय सार्वजनिक गरिएको छ । आइतबार सौलको दोङनेमुन स्थित रहेको अन्नपूर्ण सान होटलमा सयुक्त रुपमा पत्रकार सम्मेलनको आयोजना गर्दै कार्यक्रमको आय व्यय सार्वजनिक गरिएको हो ।
कार्यक्रमबाट ३८ लाख ८६ हजार ४ सय ५५ वन मुनाफा भएको आर्थिक प्रतिवेदनमा देखाइएको छ । कार्यक्रममा कुल १ करोड १७ लाख २७ हजार ५५ वन सहयोग संकनल भएको र ७८ लाख ४० हजार ६ सय वन खर्च भएको विवरण कार्यक्रमको आर्थिक संयोजक हरि भट्टराईले तयार पारिएको आर्थिक प्रतिवेदनमा उल्लेख गरिएको छ । खर्च कटाएर बाँकी रहेको रकम कुनै सामाजिक कामको लागि खर्च गरिने आयोजकले जनाएको छ ।
पत्रकार सम्मेलनमा पाँच दक्षिण कोरियाका अध्यक्ष विष्णु थापाको अध्यक्षता रहनुका साथै गैर आवासीय नेपाली संघ दक्षिण कोरियाका अध्यक्ष बुद्धी गुरुङ, नेपाली सम्पर्क समिति दक्षिण कोरियाका वरिष्ठ उपाध्यक्ष हर्क विष्ट, तामाङ घेदुङ दक्षिण कोरियाका अध्यक्ष राज कुमार स्याङतान, तमु धीं दक्षिण कोरियाका अध्यक्ष रुपा गुरुङ, प्रवासी नेपाली मञ्च दक्षिण कोरियाका अध्यक्ष अन्जान राई, जनप्रगतिशिल मञ्च दक्षिण कोरियाका अध्यक्ष जिवन खतिवडा,सुप समाजका उपाध्यक्ष बिकास बोहरा लगायतका आतिथ्यता रहेको थियो ।
गत अक्टोबर १३ तारिखमा आन्सान सहरको खुल्ला चौरमा भएको उक्त बृहत दशैँ कार्यक्रम नेपाली राजदूतावास दक्षिण कोरियाको समन्वय र नेपाली सम्पर्क समिति दक्षिण कोरियाको सहजिकरणमा सम्पन्न भएको थियो । त्यसैगरी बिभिन्न जिल्लागत, प्रादेशिक र राजनीतिक संगठनहरु पनि सह आयोजकको रुपमा रहेको थियो ।
