हेटौंडा/ १० औं उद्योग दिवसको अवसरमा काभ्रेपलाञ्चोक जिल्ला स्थित झ्याम्बल कृषि फर्म उद्योग प्रा.लिले बागमती प्रदेशकै सर्वोत्कृष्ट उद्यमी पुरस्कार प्राप्त गरेको छ । उद्योगकी सञ्चालक कमला लामालाई नगद १ लाख सहित सर्वोत्कृष्ट उद्यमीका रुपमा सम्मान गर्नुभएको हो । भोगटेको बोक्राको सेतो भागबाट क्यान्डी उत्पादन गर्दै आएको उक्त उद्योगले १५ जनालाई प्रत्यक्ष रोजगारी दिएको छ । कार्यक्रममा बागमती प्रदेशका १३ वटै जिल्लाका उत्कृष्ट उद्यमीलाई नगद ४० हजार सहित सम्मान गरिएको थियो । उत्कृष्ट उद्यामी सम्मान पाउनेहरुमा मकवानपुर जिल्लाबाट हेटौंडा १३ स्थित केम्हेन्दो एकिकृत कृषि फार्म, निलकण्ठ नगरपालिका –८ धादिङ स्थित युनिक पशुपन्छि तथा कृषि फार्म, रसुवा जिल्ला उत्तरगया गाउँपलिका ५ मा रहेको रसुवा एस एस टेलर्स एन्ड स्यानीटरी प्याड तथा माक्स उद्योग रहेका छन् ।
त्यस्तै, दुधौलि नगरपालिका ४ सिन्धुली स्थित वरपिपल दुना टपरी उद्योग, चन्द्रगिरी नगरपालिका ११ काठमाडौंको ओम फुड प्रोडक्ट, ललितपुर बागमति गाउँपालिका १ को श्रृजनशिल कृषि फामले पनि उत्कृष्ट उद्यमी पुरस्कार पाएका छन् । यस्तै, गौरीशंकर गाउपालिका ५ दोलखाको सुरी मौरी पालन तथा घार उद्योग, नुवाकोट जिल्ला स्थित नवयुवा कृषि फार्म, भक्तपुरको लक्ष्मी चिउरा उद्योग उत्कृष्ट उद्योगका रुपमा सम्मानित भएका छन् । सिन्धुपाल्चोकको कफी सहकारी उद्योग, रामेछापको मन्थली डिलक्स एग्रो फरेस्टी र काभ्रेपलाञ्चोकको बि.जे.एस ह्याण्डीकाफ्रट एण्ड पनौति सेभियर हाउस रहेका छन् ।
बागमती प्रदेशका मुख्यमन्त्री बहादुर सिं लामाले युवा पलायनलाई रोक्न सकेमात्र विश्व बजारमा बढिरहेको चुनौतीको सामना गर्न सक्ने बताए । विश्व बजारमा प्रतिस्पर्धा गर्नु अहिलेको चुनौती रहेको बताएका छन् । हेटौंडामा आइतबार भएको उद्योग दिवस तथा नवप्रवर्तन उद्यमी सम्मान कार्यक्रममा बोल्नुहुँदै उहाँले युवा शक्तिको पलायनलाई रोक्न देशभित्रै रोजगारीको सिर्जना गर्नुपर्ने उल्लेख गरेका छन् । देशमा उद्योग धन्दालाई संरक्षण गरेमा रोजगारी अवसरको सिर्जना हुने उहाँको भनाई छ । मुख्यमन्त्री लामाले नयाँ उद्योगहरु सञ्चालन गर्न लगानीकर्ताहरुलाई सुरक्षाको अनुभुति दिनुपर्ने बताउनुभयो । उद्योग र उद्योगीहरुलाई हेर्ने दृष्टिकोणमा समेत परिवर्तन गर्नुपर्नेमा मुख्यमन्त्री लामाले जोड दिए । यसैगरी कार्यक्रममा बोल्नुहुँदै उद्योग, वाणिज्य, भुमि तथा प्रशासन मन्त्री शुकमाया तामाङले उद्योग क्षेत्रको विकासको लागि प्रदेश औद्योगिक व्यवसाय ऐन संशोधन गर्नेे तयारीमा सरकार रहेको बताए । प्रदेशको उद्योग तथा वाणिज्य नीति बनाउन नीति संवाद सुरु भइसकेको उनले बताएका छीन् ।
