हेटौंडा / हेटौंडामा तामाङ साँस्कृतिक महोत्सव–२०८१ भएको छ । नेपाल तामाङ घेदुङ जिल्ला समन्वय समिति मकवानपुरले “ह्याङलान काईरन ह्याङलान काअी– जम्बुलिङरी छार्ना लाअी“ भन्ने उद्देश्यले २८६१ डुल सा पुख्री ल्हो (सर्प वर्ग) सोनाम ल्होछारको अवसरमा हेटौँडा–१०, टिसिएन चौरमा बिहीबार महोत्सव आयोजना गरेको हो ।
नेपाल तामाङ घेदुङ जिल्ला समन्वय समिति मकवानपुरका अध्यक्ष कालु घलानको सभा अध्यक्षतामा भएको कार्यक्रममा हेटौंडा उपमहानगरपालिकाकी नगर प्रमुख मिना कुमारी लामाको प्रमुख आतिथ्यता रहेको थियो । निर्माणाधिन तामाङ संग्रहालय भवन निर्माण सहयोगार्थ महोत्सवमा लामा, बोम्बो, ताम्बा डम्फुरे सहितको ¥याली तथा झाँकी प्रदर्शन, शुभकामना आदानप्रदान गरिएको थियो । कार्यक्रममै विभिन्न क्षेत्रबाट तामाङ सँस्कृतिको जगेर्ना तथा योगदान गरेको भन्दै सञ्चारकर्मी लगायतलाई सम्मान समेत गरिएको थियो ।
यसैगरी सँँस्कृतिक कार्यक्रममा मकवानपुरे तामाङ कलाकारहरुले प्रस्तुती दिएका थिए । कार्यक्रम स्थलको वरीपरी तामाङ मौलिक भेषभुषा तथा खानाका परिकारहरुको स्टल राखी प्रदर्शन समेत गरिएको थियो ।
मकवानपुर तामाङ कलाकार संघ मकवानपुरको सहआयोजनामा महोत्सव भएको हो । कार्यक्रममा बागमती गाउँपालिका अध्यक्ष शर्केस घलान, भिमफेदी गाउँपालिका अध्यक्ष हिदम लामा, हेटौंडा १५ का वडा अध्यक्ष सुनिल मोक्तान, १० का वडा अध्यक्ष फुर्वा दोर्जे लामा, मकवानपुरगढी २ का वडा अध्यक्ष बखान सिं पाखिन, नेपाल तमाङ घेदुङ बागमती प्रदेशका अध्यक्ष लिला घलान, नेपाल पत्रकार महासंघका अध्यक्ष बालकृष्ण अधिकारी, बरिष्ट पत्रकार प्रताप बिष्ट, घेदुङका पदाधिकारी लगायतको आतिथ्यता रहेको थियो । ल्होछार कार्यक्रमको ८ देखि ९ हजार दर्शकले अवलोकन गरिएको थियो ।
