हेटौंडा/ हेटौंडा १५ मानेडाँडामा अवस्थित चुरियामाई मन्दिरको नव निर्मित प्राणप्रतिष्ठा भवनको उद्घाटन भएको छ । विहिबार बागमती प्रदेशको संस्कृति तथा पर्यटन मन्त्री बिमल चन्द्र ठकुरीले मन्दिरको नव निर्मित भवनको उद्धघाटन गर्नुभएको हो ।
मन्दिर उद्घाटन गर्दै मन्त्री ठकुरीले चुरियामाई प्रतिस्थापन गर्नु गौरवको बिषय रहेको बताउनुभयो । संस्कार, सँस्कृतिको पुर्नजागरण र जगेर्ना गर्न सबै लागि पर्नुपर्नेमा उहाँले जोड दिनुभयो । उहाँले मन्दिर निर्माण र व्यस्थापनमा थप सहयोग गर्ने प्रतिबद्धता समेत व्यक्त गर्नुभएको छ । यसैगरी मन्दिर निर्माण उपभोक्ता समितीका अध्यक्ष मिना तितुङले चुरियामाईले साँस्कृतिक समृद्धि र समाजिक मेलमिलापलाई प्रवद्र्धन गर्दै आएको बताउनुभयो । चुरियामाई मन्दिर धार्मिक पर्यटन प्रवद्र्धनमा पनि कोसेढुङ्गा साबित हुनेमा बिश्वस्त रहेको उहाँले बताउनुभयो ।
अध्यक्ष तितुङले मन्दिर भवन निर्माण सम्पन्न गर्न सँस्कृति तथा पर्यटन मन्त्रालयले २३ लाख सहयोग गरेको बताउनुभयो । समारोहमा मन्दिरको प्राङगणमा यज्ञ पुजाको समेत आयोजना गरिएको थियो । कार्यक्रममा हेटौंडा १५ का वडा अध्यक्ष सुनिल मोक्तान, घर जग्गा व्यवसायी संघ मकवानपुरका अध्यक्ष पवन तिमल्सिना, खेलकुद विकास समिति मकवानपुरका पूर्व अध्यक्ष सानु लामा लगायतको आतिथ्यता रहेको थियो ।
