हेटौंडा / मकवानपुरको हेटौंडामा आयोजना हुने सातौं सहिद स्मृति स्थानीय तह राष्ट्रिय महिला गोल्डकप फुटबल प्रतियोगिता वैशाख १९ गतेदेखि सुरु हुदैं छ ।
पहिलोपटक महिला फुटबलमा केन्द्रित गर्दै आयोजना गर्न लागिएको प्रतियोगितामा राष्ट्रिय खेलाडी प्रेति राईसहित विभागीय र जिल्लास्तरीय गरी आठ टोलीहरूको सहभागिता रहने आयोजकले जानकारी दिएको छ।
प्रतियोगितामा सहभागी टिमहरूमा एपीएफ क्लब, त्रिभुवन आर्मी क्लब, नेपाल पुलिस क्लब, मकवानपुरको रिगल हेटौंडा रिसोर्ट एन्फा, बिरगंज युथ एकेडेमी, नव जनजागृति युवा क्लब सिमरा, रौतहट जिल्ला महिला टिम र चितवन जिल्ला महिला टिम छन्।
प्रतियोगिता हेटौंडा–६ स्थित गौरीटार रंगशालामा हुनेछ। आयोजक मकवानपुर जिल्ला फुटबल संघले मंगलबार पत्रकार सम्मेलन गर्दै प्रतियोगिताको तयारी पूरा भएको जनाएको हो।
विजेता टोलीले ५ लाख नगदसहित शिल्ड, मेडल र प्रमाणपत्र, उपविजेताले ३ लाख रुपैयाँ प्राप्त गर्नेछन्। उत्कृष्ट खेलाडीलाई बागमती प्रदेशसभा सदस्य इन्द्रबहादुर बाँनियाको तर्फबाट स्कुटर प्रदान गरिनेछ।
सहयोगी निकायहरूमा हेटौंडा उपमहानगरपालिकाले २५ लाख, बागमती प्रदेश खेलकुद विकास परिषद्ले १५ लाख, भीमफेदी र कैलाश गाउँपालिकाले तीन–तीन लाख रुपैयाँ सहयोग गरेका छन्।
प्रतियोगिता सञ्चालनका लागि कुल ६१ लाख रुपैयाँ लाग्ने अनुमान गरिएको छ। आयोजकको भनाइमा प्रतियोगिताले महिला सशक्तीकरण, खेलकुद विकास र स्थानीय पर्यटन प्रवर्द्धनमा टेवा पुर्याउने अपेक्षा गरिएको छ।
