हेटौंडा / नेपाल मोबाइल व्यवसायी महासंघको चौथो केन्द्रीय साधारणसभा आगामी वैशाख छब्बीस गते र सत्ताइस गते हेटौंडामा आयोजना हुँदैछ। यस कार्यक्रममा देशभरका साठी जिल्लाका व्यवसायी, सात प्रदेशका प्रतिनिधि र महासंघको केन्द्रीय नेतृत्व गरी करिब एक हजार व्यवसायी सहभागी हुनेछन्।
महासंघका केन्द्रीय उपाध्यक्ष तथा साधारणसभाका संयोजक छतेन्द्र आचार्यले पत्रकार सम्मेलनमा जानकारी दिँदै, यस सभाले मोबाइल व्यापारसँग सम्बन्धित अवसर र चुनौतीका विषयमा गहन छलफल गर्ने जानकारी दिए। “अस्वभाविक प्रतिस्पर्धा र त्यसले व्यवसायमा पारिरहेको असरलाई कसरी व्यवस्थापन गर्ने भन्ने विषयमा खुला र बन्द सत्रमा छलफल हुनेछ,” आचार्यले भने।
साधारणसभाको उद्घाटन बागमती प्रदेशका मुख्यमन्त्री बहादुरसिंह लामाले गर्नुहुनेछ। कार्यक्रम हेटौंडास्थित रोयल पार्टी प्यालेसमा हुनेछ । आयोजकले तयारी अन्तिम चरणमा पुगेको जनाएका छन् ।
कार्यक्रमस्थलमा दश वटा मोबाइल कम्पनीका स्टलहरू रहनेछन्। ती स्टलमार्फत ग्राहकहरूलाई कम्पनीका मोबाइलबारे जानकारी दिइनेछ र प्रत्यक्ष लाभ लिन सकिने विश्वास आयोजकले लिएको छ।
उद्घाटनको दिन वैशाख सत्ताइस गते बिहान सात बजे प्रभातफेरीको आयोजना गरिनेछ । कार्यक्रममा करिब बीस लाख रुपैयाँ खर्च हुने अनुमान गरिएको छ।
हाल देशभर करिब पच्चीस हजार मोबाइल व्यवसायी रहेका छन् भने मकवानपुरमा एक सय साठ्ठी व्यवसायी रहेको मोबाइल एसोसिएसन अफ मकवानपुरले जनाएको छ।
पत्रकार सम्मेलनमा मोबाइल एसोसिएसन मकवानपुरका निवर्तमान अध्यक्ष नवराज चौलागाईं, पूर्व अध्यक्ष दिनेश लामा, बागमती प्रदेश अध्यक्ष एसिस रिजाल, मधेश प्रदेश अध्यक्ष मोहनबहादुर कार्की लगायतको उपस्थिति थियो ।
