हेटौंडा / हेटौंडामा सुरु भएको सातौं शहीद स्मृति स्थानीय तह राष्ट्रिय महिला गोल्डकप फुटबल प्रतियोगिताको पहिलो दिन नै आयोजक टिम मकवानपुर पराजित भएको छ । शुक्रबार भएको उद्घाटन खेलमा चितवनले मकवानपुरलाई टाइब्रेकरमा ५–४ गोल अन्तरले हराउँदै प्रतियोगितामा विजयी सुरुवात गरेको हो ।
निर्धारित ९० मिनेटको खेल १–१ गोलको बराबरीमा सकिएपछि खेलको निर्णय टाइब्रेकरबाट गरिएको हो। दोस्रो हाफमा चितवनकी अनिता गुरुङले हेडमार्फत गोल गर्दै टिमलाई अग्रता दिलाएकी थिइन्। फ्रिकिकको अवसरलाई सदुपयोग गर्दै उनले पोस्टमा सानदार गोल गरेकी हुन्।
तर, चितवनको अग्रता धेरै समय टिक्न सकेन। मकवानपुरका खेलाडीले संघर्ष जारी राखे। एक खेलाडीले रातो कार्ड खाँदा मकवानपुर १० खेलाडीमा सीमित हुन पुगेको थियो। रेफ्रीले चितवनकी गोलकिपर सुजता तामाङमाथि फाउल गरेपछि मकवानपुरकी खुसाना राईलाई मैदान बाहिर पठाएका थिए ।
दबाबमा रहेको मकवानपुरले खेलको अन्तिम समयमा सजिना स्याङ्तानमार्फत बराबरी गोल फर्काउँदै खेललाई रोमाञ्चक बनाएको थियो। अतिरिक्त समयमा कुनै गोल हुन नसकेपछि खेल टाइब्रेकरमा पुगेको हो, जहाँ चितवनले निर्णायक सफलता हात पार्यो । उत्कृष्ट प्रदर्शन गरेकी चितवनकी अनिता गुरुङलाई ‘प्लेयर अफ द म्याच’ घोषित गर्दै नगद १० हजार रुपैयाँ र ट्रफी प्रदान गरिएको छ। प्रतियोगिताको औपचारिक उद्घाटन हेटौंडा उपमहानगरपालिकाकी प्रमुख मीनाकुमारी लामाले गर्नुभएको हो। प्रतियोगिता मकवानपुर जिल्ला फुटबल संघको आयोजनामा सञ्चालित छ। शनिबार हुने दोस्रो दिनको खेलमा नवजन जागृति क्लब ९सिमरा, बारा० र संकटा क्लब आमनेसामने हुनेछन् । खेल ४ बजे देखि सुरु हुने छन् ।
