हेटौंडा/ सातौँ शहीद स्मृति स्थानीय तह स्तरीय राष्ट्रिय महिला गोल्डकप फुटबल प्रतियोगिताको फाइनलमा उपाधिका लागि दुई विभागीय टोली – एपीएफ क्लब र नेपाल पुलिस क्लब आमनेसामने भिड्ने भएका छन् ।
मंगलबार हेटौंडा–६ स्थित गौरीटार रंगशालामा सम्पन्न दोस्रो सेमिफाइनल खेलमा एपीएफ मकवानपुरले संकटालाई २–० गोलले पराजित गर्दै उपाधि प्रतिस्पर्धामा स्थान सुरक्षित गरेको हो। एपीएफका लागि रश्मि घिसिङले खेलको ७१ औं मिनेटमा पहिलो गोल गरिन् भने ७६ औं मिनेटमा अनिता केसीले दोस्रो गोल थपिन्। दुबै गोलमा कप्तान अनिता बस्नेतले असिष्ट गरेकी थिइन्। खेलमा प्रभावशाली प्रदर्शन गरेकी रेनुका नगरकोटी ‘प्लेयर अफ दि म्याच’ घोषित भइन् । उनले नगद १० हजार रुपैयाँ पुरस्कार प्राप्त गरिन् । यसअघि भएको पहिलो सेमिफाइनल खेलमा नेपाल पुलिस क्लबले चितवनलाई ७–० को फराकिलो अन्तरले पराजित गर्दै फाइनलमा स्थान बनाएको थियो । अब उपाधिका लागि एपीएफ र पुलिस क्लबबीच फाइनल खेल बिहीबार दिउँसो ३ बजे हुनेछ । प्रतियोगिताको विजेता टिमले ५ लाख रुपैयाँसहित शिल्ड, मेडल र प्रमाणपत्र प्राप्त गर्नेछ भने उपविजेता टिमले ३ लाख रुपैयाँसहित मेडल र प्रमाणपत्र प्राप्त गर्नेछ ।
