हेटौंडा / शहीद रुद्र पाखिन र वासुदेव घिमिरेको स्मृतिमा आयोजना गरिएको तेस्रो खुला ८ ए साइड फुटबल प्रतियोगिताको दोस्रो दिन सोमबार पाँचवटा खेल सम्पन्न भएका छन् ।
मकवानपुरगढी गाउँपालिका–२ स्थित कुर्लेदमार खेलमैदानमा जारी प्रतियोगिताको पहिलो खेलमा उत्तम पानी एफसी ले चौघडा एफसीलाई २–१ ले पराजित गर्दै दोस्रो चरणमा स्थान सुरक्षित गर्यो । विजयी टिमका उर्जेन केसी म्यान अफ द म्याच घोषित भए ।
दोस्रो खेलमा, संयुक्त नव स्टार युवा क्लब र सनराइज युथ क्लबबीचको खेल रोमाञ्चक देखिएको थियो। निर्धारित समयसम्म खेल बराबरीमा सकिएपछि पेनाल्टी सुटआउटमा नव स्टारले १३–१२ को अन्तरले जित हात पार्यो। खेलमा उत्कृष्ट प्रदर्शन गरे पनि सनराइज युथ क्लबका सुरज थिङ म्यान अफ द म्याच बने ।
तेस्रो खेलमा योन्जन ढुवानी सेवा ले एफसी कालोपानीलाई ३–० गोलले सहजै हराउँदै अर्को चरणमा प्रवेश गर्यो। महेश वाइबा म्यान अफ द म्याचको उपाधि पाए ।
चौथो खेलमा, देवीडाँडा युथ क्लब ले अग्रसर युथ क्लबलाई २–१ ले पाखा लगाउँदै अर्को चरणमा स्थान बनायो। खेलमा निर्णायक भूमिका खेलेका रोमन घलान म्यान अफ द म्याच बने ।
सोमबार सम्पन्न अन्तिम खेलमा, सात नं बिहानी टिम ले टिम २५ एफसीलाई २–० ले हराउँदै दोस्रो चरणमा प्रवेश गर्यो। उक्त खेलमा प्रभावशाली प्रदर्शन गरेका अनिल थापा म्यान अफ द म्याच घोषित भए ।
प्रतियोगिता मकवानपुरगढी गाउँपालिकाको आयोजना र दाजुभाइ एफसी मकवानपुर तथा खेलकुद विकास समिति मकवानपुरगढीको सह–आयोजनामा भइरहेको हो ।
मकवानपुरगढी खेलकुद विकास समितिका अध्यक्ष बाबु लामाका अनुसार प्रतियोगिता आगामी जेठ २८ गतेसम्म चल्नेछ। विजेता टिमलाई रु ७५ हजार र उपविजेतालाई रु ४० हजार पुरस्कार प्रदान गरिनेछ ।
