हेटौंडा/ मकवानपुरगढी गाउँपालिका–२ को कुर्लेदमारमा सम्पन्न ‘शहीद रुद्र पाखिन तथा वासुदेव घिमिरे स्मृति तेस्रो मकवानपुरगढी कप खुला ८ ए साइड फुटबल प्रतियोगिता’ को उपाधि यस वर्ष दाजुभाई एफसीले उचालेको छ । बुधबार भएको रोमाञ्चक फाइनल खेलमा दाजुभाईले सिमलटार एफसीलाई पेनाल्टी सुटआउटमा पराजित गर्दै च्याम्पियन बन्न सफल भएको हो ।
निर्धारित ४० मिनेटको खेल अवधिमा दुवै टोलीले गोलरहित बराबरी खेलेपछि नतिजा पेनाल्टीमार्फत तय भएको थियो । दाजुभाई एफसीले ३–२ गोल अन्तरको जित दर्ता गर्दै विजेता बन्ने गौरव हासिल गर्यो । उपाधिसँगै दाजुभाई एफसीले नगद ७५ हजार रुपैयाँसहित ट्रफी र शिल्ड प्राप्त गर्यो भने उपविजेता बनेको सिमलटार एफसीले ४० हजार नगद र ट्रफीमा सान्त्वना टप्पर राख्यो । खेलमा उत्कृष्ठ प्रदर्शन गरेका दाजुभाईका सुजन बल म्यान अफ द म्याच घोषित भए । उनले नगद ३ हजार रुपैयाँसहित ट्रफी प्राप्त गरे। उनलाई पुरस्कार खेलकुद विकास समितिका सदस्य विक्रम योन्जनले प्रदान गरेका थिए । प्रतियोगितामा व्यक्तिगत विधामा उत्कृष्ट खेलाडीका रूपमा दाजुभाई एफसीका सामुएल सुनार चम्किए ।
यस्तै, सिमलटार एफसीका आयुष गोले उत्कृष्ट गोलरक्षक र प्रितम स्याङ्बो उत्कृष्ट डिफेन्डरको रूपमा चयन भए। दाजुभाई एफसीकै शुभराज गोले उत्कृष्ट मिडफिल्डर र समिरराज थोकर उत्कृष्ट स्ट्राइकर घोषित भए। प्रशिक्षक विधामा दाजुभाईका राज स्याङतानले उत्कृष्ट प्रशिक्षकको उपाधि प्राप्त गरे । मकवानपुरगढी गाउँपालिकाको आयोजनामा सञ्चालन गरिएको प्रतियोगितामा दाजुभाई एफसी मकवानपुर र खेलकुद विकास समिति मकवानपुरगढीले सह–आयोजकको रूपमा सक्रिय भूमिका निर्वाह गरेका थिए । पुरस्कार वितरण समारोह मकवानपुरगढी खेलकुद विकास समितिका अध्यक्ष बाबु लामाको अध्यक्षतामा सम्पन्न भएको थियो भने कार्यक्रमको प्रमुख आतिथ्य मकवानपुरगढी गाउँपालिकाकी उपाध्यक्ष मानकुमारी पाख्रिनले ग्रहण गरेकी थिइन्।
