हेटौंडा/ बागमती प्रदेश युवा परिषद्का पहिलो कार्यकारी उपाध्यक्ष सन्तोष चौलागाईंले आफ्नो चारवर्षे कार्यकाल सम्पन्न गरेका छन् ।
उनले मिति २०७८ साल जेठ ३१ मा शुरु भएको कार्यकाल २०८२ जेठ ३१ मा पूरा भएको मंगलबार पत्रकार सम्मेलनको आयोजना गर्दै जानकारी दिएको हो । प्रदेशको पहिलो कार्यकारी उपाध्यक्षको जिम्मेवारी सम्हाल्दा धेरै चुनौतीका बीचबाट अघि बढेको उल्लेख गर्दै चौलागाईंले आफ्नो कार्यकाललाई “सुखद्, उपलब्धीमूलक र सफल” रहेको बताएका छन् । प्रदेश सरकारबाट प्राप्त अधिकार, कर्तव्य तथा युवा नीति कार्यान्वयन गर्दै उनले विभिन्न कार्यक्रम सञ्चालन गरेको जानकारी दिएका छन् ।
उनको कार्यकालमा प्रदेश युवा नीति निर्माण, नमूना युवा संसद, आत्मरक्षा तालिम, प्रदेश युवा सम्मेलन, सीपमूलक तालिम लगायत कार्यक्रमहरू उल्लेखनीय रूपमा सम्पन्न भएके बताए । आर्थिक वर्ष २०८१÷८२ लाई ‘सीप वर्ष’ को रूपमा घोषणा गरी करिब १० हजार युवालाई सीप विकास तालिम दिइएको उनले बताएका छन् । यसैगरी महिला युवाका लागि आत्मरक्षा तालिम, १३ वटै जिल्लाबाट प्रशिक्षक उत्पादन, स्वरोजगार प्रवद्र्धन, कुलत न्यूनीकरणका लागि कार्यशाला, र मुख्यमन्त्रीसँग प्रत्यक्ष संवादजस्ता कार्यक्रमहरूको प्रभावकारी सञ्चालन गरिएको चौलागाईंले बताएका छन् ।
कार्यकाल अवधिमा प्रदेश सरकारमा सातवटा मन्त्रीहरूसँग सहकार्य गर्दै काम गर्नु परेको उनले उल्लेख गरेका छन् । तत्कालीन मुख्यमन्त्री डोरमणि पौडेल, मन्त्री युवराज दुलाल, सरस्वती बस्नेतदेखि लिएर हालका युवा तथा खेलकुद मन्त्री मीनकृष्ण महर्जनसम्मको सहकार्यका लागि उनले आभार प्रकट गरेका छन् । कार्यकालको अनुभव आगामी दिनमा प्रदेश सरकारलाई आवश्यक परे सहयोग गर्न तयार रहेको उनले बताएका छन् ।
