हेटौंडा / सुरक्षित आप्रवासन सामी परियोजना कार्यक्रमअन्तर्गत सञ्चारकर्मीहरूसँग अन्तरक्रिया तथा अभिमुखीकरण कार्यक्रम बिहीबार हेटौंडामा सम्पन्न भएको छ ।
सामि परियोजना मकवानपुरकी संयोजक अञ्जिता थापा मगरले मकवानपुर जिल्लामा सञ्चालित सामि कार्यक्रमको अवस्था र उपलब्धिबारे प्रस्तुति दिनुभयो । उहाँका अनुसार चालु आर्थिक वर्षमा स्रोत केन्द्रमार्फत ७ हजार २ सय ६६ जनासम्म सूचना प्रवाह गरिएको छ । ८७ प्रतिशत सेवाग्राहीहरूको उद्देश्य वैदेशिक रोजगारी रहेको जानकारी दिँदै उहाँले महिलाको सहभागिता उल्लेख्य रूपमा बढिरहेको बताउनुभयो । उहाँका अनुसार चालू आर्थिक वर्षको चैत सम्ममा मकवानपुरबाट ३ हजारको संख्यामा महिला वैदेशिक रोजगारीको लागि विदेशिएको छ ।
मकवानपुरमा चालू आर्थिक वर्षको चैत सम्ममा श्रम स्वीकृति लिएर वैदेशिक रोजगारीमा जानेहरुमा पुरुष ८ हजार २ सय ५७ र महिला ३ हजार रहेकोे छ । त्यस्तै, ४ सय ४५ जना सेवाग्राही फलोअपमा रहेको र २९ जनाले वैदेशिक रोजगारीका लागि जाने प्रक्रिया पूरा गरिसकेको जानकारी दिनुभयो । गहन अभिमुखीकरण कार्यक्रममार्फत ४ सय ७६ जनाले प्रत्यक्ष सूचना प्राप्त गरेका छन् भने स्रोत केन्द्रमा उजुरी पेस गर्ने क्रम पनि बढ्दो छ ।
चालु आर्थिक वर्षमा १ सय ३३ वटा उजुरी केस दर्ता भएकोमा करिब ४७ प्रतिशत केसको समाधान भइसकेको उहाँले बताउनुभयो । कार्यक्रममा हेटौंडा उपमहानगरपालिकाका सामाजिक विकास महाशाखा प्रमुख भिमप्रसाद तिम्ल्सिनाले वैदेशिक रोजगार व्यवस्थापनको विषयमा प्रस्तुति दिनुभयो । उहाँले वैदेशिक रोजगारमा देखिने समस्या, समाधानका उपायहरू र स्थानीय सरकारको भूमिकाबारे चर्चा गर्नुभयो । संचारकर्मीहरूका लागि आयोजित उक्त कार्यक्रममा वैदेशिक रोजगार, सुरक्षित आप्रवासन र पत्रकारिताको भूमिका सम्बन्धी विभिन्न धारणा आदानप्रदान गरिएको थियो ।
