हेटौंडा / अघिल्ला वर्षमा घाटा व्यहोर्दै आएको मकवानपुर जिल्ला फुटबल संघले यस वर्ष पहिलोपटक महिला गोल्डकप आयोजना गरेर ८ लाख ३५ हजार रुपैयाँ मुनाफा कमाएको छ ।
संघले शुक्रबार पत्रकार सम्मेलन गर्दै सातौं संस्करणको शहीद स्मृति मकवानपुर राष्ट्रिय महिला गोल्डकप प्रतियोगिताको आय–व्यय विवरण सार्वजनिक गरेको हो । प्रतियोगिताबाट ६४ लाख ९८ हजार रुपैयाँ आम्दानी भएकोमा ५६ लाख ६२ हजार रुपैयाँ खर्च भएको जानकारी संघका कोषाध्यक्ष अमृत लुङबाले दिए । गत वैशाख १९ देखि २५ गतेसम्म, हेटौंडा–६ स्थित गौरीटार रंगशालामा भएको प्रतियोगितामा ८ टिमले प्रतिस्पर्धा गरेका थिए । फाइनल खेलमा सशस्त्र प्रहरीको एपीएफ क्लबले नेपाल पुलिस क्लबलाई टाइब्रेकरमा ३–१ ले पराजित गर्दै उपाधि जितेको थियो ।
हेटौंडा उपमहानगरपालिकाको मुख्य सहयोगमा सम्पन्न प्रतियोगितामा बागमती प्रदेश खेलकुद परिषद्, भीमफेदी, कैलाश, र इन्द्रसरोवर गाउँपालिकाको विशेष साथ रहेको थियो । पत्रकार सम्मेलनमा संघका अध्यक्ष टिकाराम लामा, महासचिव छविलाल सुवेदी, र गोल्डकप संयोजक प्रताप विष्टको पनि उपस्थिति थियो । छैटौं संस्करणसम्म पुरुष गोल्डकप गर्दै आएको संघले घाटाका कारण यसपटकदेखि महिला गोल्डकप सुरु गरेको थियो। यो निर्णय संघका लागि टर्निङ प्वाइन्ट सावित भएको देखिन्छ ।
