हेटौंडा/ कांग्रेस बागमती प्रदेशमा आन्तरिक विवाद चुलिँदै जाँदा पार्टीभित्रैबाट मुख्यमन्त्री बहादुरसिंह लामाविरुद्ध अविश्वास प्रस्ताव दर्ता भएको छ । पार्टीकै २१ जना प्रदेशसभा सदस्यले लामाको नेतृत्वमा असन्तुष्टि जनाउँदै प्रदेश संसद सचिवालयमा हस्ताक्षरसहितको अविश्वास प्रस्ताव पेश गरेका हुन् ।
संसदीय गणितअनुसार ३७ सदस्य रहेको कांग्रेस प्रदेश दलमा नेता बन्न १९ मत पर्याप्त हुन्छ । अहिले बहुमत सांसदको समर्थनमा प्रस्ताव दर्ता भएपछि लामाको नेतृत्व संकटमा परेको छ । यसअघि इन्द्र बानियाँलाई पराजित गर्दै नेता बनेका लामामाथि जनअपेक्षा अनुसार शासन गर्न नसकेको आरोप लागेको छ । यसैबीच सरकारमा रहेका चारजना मन्त्री—सुरजचन्द्र लामिछाने, मिनकृष्ण महर्जन, बिमल ठकुरी र मदु कुमार श्रेष्ठ—ले पनि सामूहिक रूपमा राजीनामा दिँदै नेतृत्वमा असहमति प्रकट गरेका छन् । अविश्वास प्रस्तावको पृष्ठभूमिमा प्रदेश सरकारले ल्याएको आगामी आर्थिक वर्ष २०८२÷८३ को बजेटलाई लिएर दलभित्रै ठूलो विवाद उत्पन्न भएको थियो । बजेट व्यवस्थापनमा सन्तुलन नदेखिएको भन्दै लामाको कार्यशैलीप्रति चर्को असन्तुष्टि बढेको बताइन्छ । कांग्रेस संसदीय दलको कार्यालयमा सभापति समेत रहेका इन्द्र बानियाँको संयोजनमा बसेको बैठकले अविश्वास प्रस्ताव अघि बढाएको हो । बानियाँले दलभित्रको बहुमत लामाको पक्षमा नरहेको पुष्टि गर्दै केही दिनभित्र नयाँ नेता चयन हुने जानकारी दिएका छन् ।
