मकवानपुर/ विद्यालयका बालबालिकाको शारीरिक, मानसिक र सामाजिक विकासमा सहयोग पुग्ने उद्देश्यसहितको अन्तर्राष्ट्रिय ‘फुटबल फर स्कूल्स’ कार्यक्रम मकवानपुर जिल्लामा औपचारिक रूपमा प्रारम्भ भएको छ ।
अखिल नेपाल फुटबल संघ ९एन्फा० अन्तर्गत मकवानपुर जिल्ला फुटबल संघको संयोजनमा हेटौंडा–६ गौरीटार रंगशालामा आयोजित उद्घाटन समारोहमा बागमती प्रदेशका मुख्यमन्त्री इन्द्रबहादुर बानियाँले कार्यक्रम शुभारम्भ गर्नुभयो । फिफा र युनेस्कोको साझेदारीमा सञ्चालन हुने यो कार्यक्रममार्फत विश्वभर ४ देखि १४ वर्ष उमेर समूहका करिब ७० करोड बालबालिकालाई फुटबलसँग जोड्ने लक्ष्य लिइएको छ । नेपालमा ७७ जिल्लाका १ हजार ७२ विद्यालयमा कार्यान्वयन हुने कार्यक्रमअन्तर्गत ३२ हजार ६ सय ४० फुटबल वितरण गरिने एन्फा अध्यक्ष पंकज विक्रम नेम्वाङले जानकारी दिनुभयो। मकवानपुरमा भने २२ विद्यालय यस अभियानमा सहभागी हुनेछन् ।
मुख्यमन्त्री बानियाँले खेलकुदलाई प्रदेश सरकारको प्राथमिकतामा राखिएको उल्लेख गर्दै गौरीटार रंगशालालाई अन्तर्राष्ट्रिय प्रतियोगिता सञ्चालन गर्न सक्ने स्तरमा निर्माण सम्पन्न गरिने प्रतिबद्धता व्यक्त गर्नुभयो । उहाँले विद्यालयस्तरमै खेलप्रति आकर्षण बढाउन एन्फाले गरेको पहल प्रशंसनीय रहेको बताउनुभयो । यसै अवसरमा गत असोजमा पहिरोमा परी निधन भएका १४ वर्षमुनिका खेलाडीहरूको स्मृतिमा यु–१४ विद्यालयस्तरीय मकवानपुर जिल्ला क्वालिफाइ फुटबल प्रतियोगिता पनि सुरु भएको छ। भदौ २८ गतेसम्म चल्ने सो प्रतियोगितामा १२ विद्यालयले सहभागिता जनाएका छन् ।
