हेटौंडा / भारत सरकारले बाढी–पहिरो प्रभावित क्षेत्रका सडक सञ्जाल पुनःस्थापना गर्न नेपाललाई यस वर्ष पनि १० वटा बेलीब्रीज उपलब्ध गराएको छ । हेटौंडास्थित सडक डिभिजन कार्यालयमा आयोजित कार्यक्रममा भारतीय राजदूत नवीन श्रीवास्तवले भौतिक पूर्वाधारमन्त्री कुलमान घिसिङलाई पुलका सामग्री प्रतीकात्मक रूपमा हस्तान्तरण गर्नुभयो ।
राजदूत श्रीवास्तवले नेपाल–भारतबीचको ऐतिहासिक र सहयोगी सम्बन्धलाई उल्लेख गर्दै पूर्वाधार विकासमा भारतको निरन्तर सहयोग रहने बताए । मन्त्री घिसिङले गत वर्ष उपलब्ध गराइएका बेलीब्रीजकै कारण बाढी–पहिरो प्रभावित राजमार्ग छिट्टै सञ्चालनमा ल्याउन सहयोग पुगेको बताए ।
नेपाल सरकारको अनुरोधमा उपलब्ध गराइएका ती पुल ७० मिटरभन्दा बढी लम्बाइ र ५.२५ मिटर चौडाइका छन् । भौतिक पूर्वाधार मन्त्रालयका सचिव केशवकुमार शर्माका अनुसार तत्कालै ४ स्थानमा जडानको तयारी सुरु भएको छ । उपलब्ध १० मध्ये हाल एक मात्र नेपाल आएको र बाँकी चाँडै आउने जानकारी उनले दिए। भारतले पुल जडानका लागि प्राविधिक सहयोग पनि उपलब्ध गराउने बताइएको छ ।
