हेटौंडा/ खेलकुद विकास समिति मकवानपुर गढी गाउँपालिकाको आयोजनामा सहिद रुद्र पाख्रिन तथा बासुदेव घिमिरे स्मृति खुला एट ए साइट फुटबल प्रतियोगिता हुने भएको छ ।
शुक्रबार आयोजित पत्रकार सम्मेलनमार्फत आयोजक समितिले प्रतियोगिता यहि चैत्र २७ गते देखि हुने जानकारी गराएको हो। प्रतियोगिता मकवानपुर गढी–२ स्थित कुर्ले दमार चौरमा सञ्चालन हुने जनाइएको । आयोजक खेलकुद विकास समितिका अध्यक्ष बाबु स्याङ्तानका अनुसार प्रतियोगितालाई व्यवस्थित र प्रतिस्पर्धात्मक बनाउने तयारी तीव्र रूपमा भइरहेको छ । उहाँले प्रतियोगिताले स्थानीय स्तरमा खेलकुदको विकास, युवाहरूमा खेलप्रति आकर्षण वृद्धि तथा स्वस्थ प्रतिस्पर्धाको वातावरण निर्माण गर्ने विश्वास व्यक्त गर्नुभयो ।
यसै गरी समितिका सदस्य बिक्रम योन्जनका अनुसार प्रतियोगितामा प्रथम हुने टोलीलाई १ लाख रुपैयाँ नगद पुरस्कार प्रदान गरिनेछ भने दोस्रो हुने टोलीलाई ५० हजार रुपैयाँ प्रदान गर्नेछ। साथै, अन्य उत्कृष्ट खेलाडीहरूलाई विभिन्न विधामा शिल्ड, मेडल तथा प्रमाणपत्र प्रदान गरिने छ । खुल्ला रूपमा सञ्चालन गरिने यस प्रतियोगितामा विभिन्न स्थानबाट टोलीहरूले सहभागिता जनाउन सक्नेछन् प्रतियोगिता सञ्चालनको लागि गढी गाउँपालिकाले ५ लाख रुपैँया बजेट बिनियोजन गरेको छ ।
