हेटौंडा / धेरै महिलाहरूले महिनावारी हुनुअघि वा महिनावारीकै समयमा पेट फुलेजस्तो, भारी वा ग्यास भरिएको अनुभव गर्ने गर्छन् । चिकित्सकहरूका अनुसार यो सामान्य शारीरिक प्रक्रिया हो र यसको मुख्य कारण शरीरमा हुने हर्मोन परिवर्तन हो।
महिनावारी चक्रको क्रममा महिलाको शरीरमा इस्ट्रोजेन र प्रोजेस्टेरोन नामक हर्मोनको मात्रा उतारचढाव भइरहन्छ। यी हर्मोन परिवर्तनका कारण शरीरले केही समय पानी र नुन बढी सञ्चित गर्न सक्छ। यही कारण पेट, कम्मर वा शरीरका अन्य भाग सुन्निएको वा फुलेजस्तो महसुस हुन सक्छ ।
स्त्रीरोग विशेषज्ञहरूका अनुसार महिनावारी सुरु हुनुभन्दा केही दिनअघि पाठेघरले भित्री तह तयार पारिरहेको हुन्छ । गर्भ नरहेपछि त्यो तह रगतसँगै बाहिर निस्कन्छ, जसलाई महिनावारी भनिन्छ । यही प्रक्रियाका क्रममा पाठेघरमा हल्का संकुचन हुने भएकाले तल्लो पेट भारी, दुख्ने वा फुलेको अनुभूति हुन सक्छ । चिकित्सकहरूले पाचन प्रणालीमा पनि हर्मोनको प्रभाव पर्ने बताउँछन् । त्यसका कारण कतिपय महिलामा ग्यास, कब्जियत वा पेट ढिलो खाली हुने समस्या देखिन सक्छ। यसले पनि पेट फुलेजस्तो अनुभूति गराउँछ । स्वास्थ्यकर्मीहरूका अनुसार यस्तो समस्या सामान्यतया केही दिनमै कम हुन्छ । पर्याप्त पानी पिउने, नुनिलो तथा अत्यधिक प्रशोधित खाना कम खाने, हल्का व्यायाम गर्ने र पर्याप्त आराम गर्ने गर्दा असहजता कम हुन सक्छ ।
तर यदि पेट अत्यधिक फुल्ने, असह्य दुखाइ हुने, महिनावारी अत्यन्त अनियमित हुने, वा लामो समयसम्म समस्या रहने अवस्था भए चिकित्सकसँग परामर्श लिन सुझाव दिइएको छ । कहिलेकाहीँ हार्मोन असन्तुलन, पाठेघरसम्बन्धी समस्या वा पाचनसम्बन्धी रोगका कारण पनि यस्ता लक्षण देखिन सक्छन् । महिनावारीसँग सम्बन्धित शारीरिक परिवर्तनबारे खुला रूपमा जानकारी र स्वास्थ्य शिक्षा आवश्यक रहेको स्वास्थ्य विज्ञहरूले बताएका छन् ।
