शुभराज भोम्जन
दक्षिण कोरिया । गैर आवासीय नेपाली संघ ग्लोबल फाउण्डेशनको मुख्य आयोजनामा दक्षिण कोरियाको राजधानी सौलमा आउदो ६ फेब्रअरीको दिन “स्पोर्टस ग्लोबल टुरिजम” विषयक एकदिने गोेष्ठी हुने भएको छ । मुख्य आयोजकको रुपमा गैर आवासीय नेपाली संघ ग्लोबल फाउण्डेशन रहनुका साथै नेपाली राजदुताबास दक्षिण कोरिया, हानयाङ विश्वविद्यालय, मिट ग्रुप फाउण्डेशन पनि आयोजकको रुपमा रहेको छ ।
त्यसैगरी गैर आवासीय नेपाली संघ दक्षिण कोरिया र नेस्पो पनि सह -आयोजकको रुपमा रहने कार्यक्रममा नेपालबाट सँस्कुति पर्यटन तथा नागरिक उड्यान राज्यमन्त्री सुशिला सिर्पाली ठकुरी, दक्षिण कोरियाका लागि नेपाली राजदुत डा. ज्योती प्याकुरेल भण्डारी, राष्ट्रिय खेलकुद परिषदका सदस्य सचिव टंकलाल घिसीङ तामाङको सहभागिता रहने आयोजक संस्थाका अध्यक्ष बिनोद कुँवरले विज्ञप्ती मार्फत जानकारी दिएका छन् । त्यसैगरी उक्त कार्यक्रममा दक्षिण कोरियाका लागि पाकिस्तानी राजदुत, श्रीलंकाली राजदुत,कम्बोडियाली राजदुत र गैर आवासी नेपाली संघ ग्लोबलका पूर्व अध्यक्ष तथा व्यबसायी शेष घलेको पनि सहभागिता रहने विज्ञप्तीमा उल्लेख गरिएको छ । उक्त गोष्ठीले नेपालको खेल पर्यटनमा प्रवर्दन हुनुका साथै मुलुक बिकासको निम्ती थुप्रै टेवा पुर्याउने आयोजक संस्थाले जनाएको छ ।
