हेटौंडा/ मकवानपुरको राक्सिराङ्ग गाउँपालिका स्थित हिमाली देबिटार कृषि सहकारी संस्था लिमिटेडले रैथाने बालि संकलन केन्द्र स्थापना गरेको छ । संस्थाको चौथो बार्षिक साधारण सभाको अवसरमा स्थानीय उत्पादन कृषि उपज तथा रैथाने बाली बिक्री वितरण गर्न संकलन केन्द्र स्थापना गरिएको हो ।
मंगलबार भएको उक्त कार्यक्रममा गाउँपालिका अध्यक्ष राजकुमार मल्लले संकलन केन्द्रको उद्घाटन गरेका थिए । वडा नं. ८ मा रहेको संस्थाले गाउँघरमै उत्पादित रैथाने कृषि उपजहरुलाई बजारीकरण गर्ने कामको शुरुवात गरेको हो । गाउँपालिका अध्यक्ष राजकुमार मल्लले रैथाने बालीको उत्पादन बढाउन आग्रह गरेका छन् । लोप हुदैँ गएका रैथाने बालीहरुको संरक्षण र उत्पादन बृद्धि गर्न गाउँपालिकाले अनुदानको ब्यवस्था गर्ने उहाँले बताउनुभयो । रैथाने बाली, कृषि उपजहरुलाई बजारीकरणको लागि ब्राण्डिङ्ग गर्दै लैजाने अध्यक्ष्य मल्लले बताए ।
