शुभराज भोम्जन
दक्षिण कोरिया । नेपाली राजदूतावास दक्षिण कोरियाको मुख्य आयोजनामा र नेपाली सम्पर्क समिति दक्षिण कोरियाको सह आयोजनामा आउदो २५ फेब्रुअरी २०२४ मा दक्षिण कोरियाको ख्याङगीदोको छेबुदोमा श्रमिक अभिमुखीकरण तथा घुम्ती सेवा सञ्चालन हुने भएको छ ।
उक्त कार्यक्रममा श्रमिक अभिमुखीकरण सचेतना, कन्सुलर सेवा, सामाजिक सुरक्षा कोष, भिषा परामर्श, कानुनी तथा अपराध सम्बन्धी परामर्श गर्नुका साथै राहदानी नबिकरण सेवा पनि प्रदान गरिने नेपाली सम्पर्क समिति दक्षिण कोरियाका अध्यक्ष हरि प्रसाद खनालले जानकारी दिएका छन् । नेपाली राजदूतावासबाट जाने विज्ञ प्रतिनिधीहरुले सुखद घर फिर्ती श्रमीक अभिमुखीकरण गर्नुका साथै सामाजिक सुरक्षा कोष र कोरियाको अध्यागमन कानुन सम्बन्धी अभिमुखीकरण गर्ने जनाएको छ । त्यसैगरी भिषा सम्बन्धी परामर्श गरिनुका साथै विदेशी विद्यार्थीहरुका लागि दक्षिण कोरियाले दिदै आएको पुर्ण छात्रबृत्ति योजनाको विषयमा पनि जानकारी दिने अध्यक्ष खनालले जनाएको छ ।
경기도 화성시 서신면 전곡산단 ११ 길१०७ मा हुने उक्त अभिमुखीकरण तथा घुम्ती सेवामा सहभागि भएर सेवा लिनको निम्ती अध्यक्ष खनालले लाबा न्युज मार्फत सार्वजानिक रुपमा आह्वान समेत गरेका छन् । त्यसैदिन उक्त कार्यक्रम स्थानबाट बैकिङ सेवा पनि लिन सकिने छ । उक्त श्रमीक अभिमुखीकरण सचेतना तथा घुम्ती सेवा मार्फत छेबुदो आसपासमा रहेको २ सय भन्दा बढी नेपालीहरुले सेवा लिने अनुमान गरिएको छ ।
