बोम्जन गुरुङ
दक्षिण कोरिया । गुरुङ समुदायको मातृ संगठन तमू धीं थेगु शाखाले आउँदो मे महिनाको १८ र १९ तारिक दुई दिने बृहत् बनभोज कार्यक्रम आयोजना गर्ने भएको छ । संस्थाले सउल, बुसान र थेगुको मध्य भागमा पायक पर्ने गरि थेजन 대전 서구 장안동 288 장안로 326 मा बृहत बनभोज कार्यक्रमको आयोजना गर्ने तय गरिएको हो ।
कोरियामा रहेर विभिन्न पेशा, व्यवसाय तथा रोजगारीको शिलशिलामा आबद्ध तमू दाजुभाई तथा दिदीबहिनीहरु साथै नेपाली विचको आत्मीयता र एकता अभिबृद्धि गर्ने अभिप्रायले उक्त बनभोज कार्यक्रम आयोजना गर्न लागिएको संस्थाका अध्यक्ष मनी गुरुङले बताए। संस्थालाई थप चलायमान गराउनुका साथै मनोरम दृश्य अवलोकनसँगै विविध मनोरञ्जनात्मक कार्यक्रम सहित सुविधा सम्पन्न बनभोज स्थल छनौट गरिएकोले कार्यक्रममा ब्यापक सहभागिता हुने विश्वास सोही शाखाका सचिव कृष्ण गुरुङले व्यक्त गरे ।
तमू धीं थेगु शाखाद्धारा आयोजना हुने उक्त बृहत् बनभोज कार्यक्रमका अन्य विस्तृत जानकारी तथा आकर्षणहरु छिट्टै सार्वजनिक गरिने आयोजकले जनाएको छ । बाक्लो उपस्थितिको अपेक्षा गरिएको उक्त कार्यक्रम सफल बनाइदिनुहुन समस्त तमू तथा गैर तमू महानुभावहरुमा आयोजक संस्थाले सार्वजानिक रुपमा अनुरोध गरेको छ ।
