शुभराज भोम्जन
दक्षिण कोरिया । किरात याक्थुङ चुम्लुङ दक्षिण कोरियाले आफ्नो २४ औँ वार्षिकोत्सव यहि सनिबार अप्रिल १३ मा मनाउने भएको छ ।
दक्षिण कोरियामा छरिएर रहेका लिम्बु समुदायको साँझा संस्था चुम्लुङले आफ्नो २४ औँ वार्षिकोत्सवको अवसरमा आन्तरिक रुपमा एक औपचारिक कार्यक्रमको आयोजना गरेर मनाउन लागेको हो । दक्षिण कोरियाको दोङदेमुन स्थित रहेको नेपाली थाइ रेष्टुरेण्टको सभाहलमा हुने उक्त कार्यक्रममा केन्द्रिय कार्यसमिति र क्षेत्रीय कार्यसमितिको पदाधिकारी एवम् सदस्यहरुको सहभागिता रहनुका साथै संस्थाका सल्लाहकार र लिम्बु समुदाय भित्रको थुप्रै ब्यक्तिहरुको बाक्लो सहभागिता रहने चुम्लुङ दक्षिण कोरियाका अध्यक्ष दिर्ज काङ्भा लिम्बुले बताएका छन् ।
सनिबार साँझ ६ः३० बजेदेखि सुरुहुने कार्यक्रममा संस्थाको आर्थिक प्रगति प्रतिवेदन सार्वजनिक गर्नुका साथै संस्थाका संस्थापकहरुलाई सम्मान समेत गरिने जनाएको छ । त्यसैगरी उक्त कार्यक्रमको अवसरमा संस्थाको वेवसाइट सार्वजनिक समेत गरिने जनाएको छ । दक्षिण कोरियामा रहेका लिम्बुहरुको साँझा संस्था भएकाले विगतमा संस्थाले गरेको कार्यत्रहरुको समिक्षा गर्दै वर्तमान र भविश्यको लागि थप कार्ययोजनाहरुको विषयमा ब्यापक छलफल गर्ने योजना समेत रहेको अध्यक्ष काङभाले बताए । संस्थाको आन्तरिक विषयहरुमा ब्यापक छलफल हुने भएकाले अन्य संघ संस्थाहरुलाई निमन्त्रणा नगरिएको जनाएको छ । चुम्लुङ दक्षिण कोरिया विगत २४ वर्ष देखि दक्षिण कोरियाको नेपाली समाजमा सकृय रुपमा कृयाशिल हुदै आइरहेको छ ।
