शुभराज भोम्जन
दक्षिण कोरिया । भगवान गौतम बुद्धको जन्मजयन्तीको अवसरमा दक्षिण कोरियामा विगत १२ सय वर्ष अघिदेखि आयोजना हुदै आएको लोटस लालटेन फेस्टिभलको नेपालको तर्फबाट सहभागि हुनको लागि तयारी पुरा भएको छ ।
उक्त फेस्टिभलको पहिलो दिन भोली सनिबार दोङगुक विश्वविद्यालयको प्राङगणबाट दिउँसो ४ बजेदेखि रथ यात्रा सुरु हुदै छ । फेस्टिभलको दोश्रो दिन पर्सी आइताबार जोगेसाको अगाडीको सडकमा साँस्कृतिक प्रदर्शनी समेत हुदै छ । नेपालको तर्फबाट नेपाल बौद्ध परिवार दक्षिण कोरियाले विगत देखिनै उक्त उत्सबमा सहभागिता जनाउदै आइरहेको छ । यस वर्ष भने नेपाल बौद्ध परिवारको आयोजनामा नेपाली राजदूतावास र दक्षिण कोरियामा कृयाशिल बिभिन्न जातिय तथा समाजिक संघ संस्थाहरुको पनि स्वामितव रहनेगरी गौतम बुद्ध नेपालमा जन्मिएका हुन् भन्ने शन्देश प्रवाह गर्ने मुख्य उद्धेश्य सहित सहभागिता जनाउन लागिएको हो ।
उक्त उत्सबमा नेपाल सहित अन्य थुप्रै देशहरुले सहभागिता जनाउने गर्दछ । नेपालको तर्फबाट सहभागिहरुले लुम्बीनी रथ, गौतम बुद्धको प्रतिमा, लुम्बीनीको प्रचार सामाग्री र बुद्ध नेपालमा जन्मिएका हुन् भन्ने टिसर्ट लगाएर र्यालीमा सहभागि हुनेछन् । यस वर्ष नेपालको तर्फबाट सहभागि जनाउदा लाग्ने खर्च जुटाउन दूतावास र दक्षिण कोरियामा कृयाशिल बिभिन्न संघ संस्था र संस्थामा आवद्ध व्यक्तिहरुले ब्यक्तिगत र संस्थागत रुपमा सहयोग गरेका छन् । उक्त कार्यक्रममा सहागिता जनाउनको लागि नेपाली राजदूतावास र नेपाल बौद्ध परिवारको तर्फबाट दक्षिण कोरियामा रहेका नेपालीहरुलाई अपिल समेत गरेका छन् । नेपाल बौद्ध परिवार दक्षिण कोरियाका महासचिवले यस वर्ष विगतको वर्षहरुमा भन्दा पृथक ढंगले सहभागिता जनाउन लागेको जनाएका छन् ।
