हेटौँडा/ मकवानपुरको हेटौँडा उपमहानगरपालिका–१५, नयाँबस्तीस्थित सयफुटमा सोमबार बिहान स्याउ बोकेको टेलर दुर्घटना हुँदा चालक र सहचालक घाइते भएका छन् ।
वीरगञ्जबाट स्याउ लोड गरी काठमाडौं जाँदै गरेको मधेश प्रदेश ०३–००१ ख ९०६८ नम्बरको टेलर चालक निदाएका कारण अनियन्त्रित भई सडकबाट करिब १० फिट तल खोलाको बगरमा पल्टिएको जिल्ला प्रहरी कार्यालय मकवानपुरले जनाएको छ । दुर्घटनामा वीरगञ्ज महानगरपालिका–२१, परवानीपुरका २५ वर्षीय टेलर चालक नरेश महतो र सोही स्थानका २८ वर्षीय सहचालक रमेश कुशवाह घाइते भएका छन् । उनीहरूलाई खुट्टा र ढाडमा चोट लागेको प्रहरीले जनाएको छ ।
महेन्द्र राजमार्गअन्तर्गत उक्त स्थानमा सोमबार बिहान करिब ४ः३० बजे दुर्घटना भएको हो। दुर्घटनाको जानकारी पाएलगत्तै प्रहरी चौकी रातोमाटेबाट ट्राफिक प्रहरीसहितको टोली घटनास्थल पुगेको थियो । जिल्ला प्रहरी कार्यालय मकवानपुरका सूचना अधिकारी प्रहरी नायब उपरीक्षक माधवप्रसाद काफ्लेका अनुसार घाइते दुवै जनाको हेटौँडा अस्पतालमा उपचार भइरहेको छ । दुर्घटनाग्रस्त टेलर घटनास्थलमै रहेको र दुर्घटनाका कारण सडक आवागमनमा कुनै अवरोध नभएको प्रहरीले जनाएको छ।
