शुभराज भोम्जन
दक्षिण कोरिया । नेपाल आदिवासी जनजाति महासंघ (नेफिन) दक्षिण कोरिया जेजु शाखाको आयोजनामा हुन लागिएको ३० औँ विश्व आदिवासी दिवसको तयारी तीब्र रुपमा भइरहेको अध्यक्ष गजिन हाङस्रोङले जानकारी दिएका छन् ।
आउँदो अगस्ट ४ आइतबारको दिन जेजुदोको 제주특별자치도 명신 १길 ११ मा हुन लागिएको उक्त कार्यक्रमको तयारी अन्तिम चरणमा पुगेको जनाएको छ । सयुक्त राष्ट्रसंघको पहलमा सन् १९९५ देखि अगस्ट ९ तारिखको दिनलाई विश्व आदिवासी दिवसको रुपमा मनाउने निर्णय गरिएको थियो । सोही निर्णय मुताबिक विश्वका थुप्रै देशहरूमा विश्व आदिवासी दिवस मनाउँदै आइरहेको छ । जेजु शाखाले गत वर्ष झै यसवर्ष पनि आदिवासीहरूको विविध झाँकी, संस्कृति तथा रैथाने परिकारहरू सहितको मौलिक प्रकृतिको कार्यक्रमको आयोजना गर्न लागिएको हो । अगस्ट ९ लाई दिवसको दिनको रुपमा लिए पनि समय अनुकुलताको आधारमा अगस्ट ४ मा नै दिवस मनाउन लागिएको हो ।
कार्यक्रमको मुख्य आयोजक महासंघ जेजु शाखा रहनुका साथै सह आयोजकको रुपमा महासंघमा आवद्ध जेजु शाखाको रुपमा स्थापना गरिएको जातीय संस्थाहरू रहेका छन् । रैथाने ज्ञान, संस्कृति र परम्पराहरूको संरक्षण र प्रवर्द्धन आजको आवश्यकता, समानता सह अस्तित्व र पहिचान प्राप्तिको निम्ति आदिवासी जनजातिहरूको एकता भन्ने मूल नाराका साथ आयोजना हुन लागिएको कार्यक्रममा सहभागिताको लागि आयोजकले अपिल समेत गरेका छन् । त्यसैगरी महासङ्घ केन्द्र सौलले भने अगस्ट ११ तारिखमा वृहत रुपमा कार्यक्रमको आयोजना गर्ने तयारी गरिरहेका छन् भने महासङ्घ बुसान शाखाले अगस्ट १८ मा दिवस मनाउने तयारी गरिरहेका छन् ।
