दक्षिण कोरिया । सन् २०१५ देखि दक्षिण कोरियामा क्रियाशील रहँदै आएको पूर्वाञ्चल सरोकार समाज दक्षिण कोरिया अन्तर्गत रहेर कोरियन पर्व छुसकको अवसरमा आयोजना गरिने कार्यक्रमहरूको पोस्टर सार्वजनिक गरिएको छ ।
आइतबार पूर्वाञ्चल सरोकार समाज दक्षिण कोरियाको सौलको दोङदेमुन स्थित रहेको कार्यालयमा पत्रकार सम्मेलनको आयोजना गर्दै पोस्टर सार्वजनिक गरिएको हो । आउदो छुसकमा पाँचथर सेवा समाजको आयोजनामा गर्न लागिएको पाँचथर सांगीतिक सौगात भाग २ मा नेपथ्य ब्याण्ड ल्याउने जानकारी दिनुका साथै पोस्टर समेत सार्वजनिक गरेका छन् । त्यसैगरी रात्रिकालीन कार्यक्रमको रुपमा किरात याक्थुङ चुम्लुङ दक्षिण कोरियाको आयोजनामा याक्थुङ रैथाने मेलोडी नाइट र भोजपुर सेवा समाजको आयोजनामा भोजपुर डान्स पार्टीको आयोजना गर्ने जनाएको छ ।
पत्रकार सम्मेलनमा कार्यक्रमहरूको पोस्टर सार्वजनिक गर्नुका साथै कार्यक्रम आयोजना गर्नुको उद्देश्य र हाल सम्मको तयारीको विषयमा जानकारी गराइएको थियो । कार्यक्रमको तयारीमा तागेता पनि नेपालमा कलाकारहरूको भिसा अप्लाइ गर्नको लागि डेट नपाएर समस्यामा परिरहेको पाँचथर सांगीतिक सौगात भाग २ का आयोजक संस्थाका अध्यक्ष रमेश लावतीले बताए । पत्रकार सम्मेलन पूर्वाञ्चल सरोकार समाजका अध्यक्ष गजेन्द्र शर्माको अध्यक्षतामा हुनुका साथै संस्थाका सल्लाहकार तथा संस्था सम्बद्ध प्रतिनिधिहरूको आतिथ्यता रहेको थियो । उक्त कार्यक्रमको अवसरमा किरात राई यायोक्खा दक्षिण कोरिया र किरात याक्थुङ चुम्लुङ दक्षिण कोरियाले समाजलाई प्रोजेक्टर सहयोग समेत हस्तान्तरण गरेको थियो ।
वार्षिक साधारण सभा सम्पन्न
पूर्वाञ्चल सरोकार समाजले आफ्नो वार्षिक साधारण सभा समेत सम्पन्न गरेको छ । संस्थाले छुसकमा आयोजना गर्न लागिएको कार्यक्रमहरूको पोस्टर सार्वजनिक गर्ने पहिलो सेसनको कार्यक्रम सक्किने बित्तिकै वार्षिक साधारण सभाको कार्यक्रमलाई अगाढी बढाएको थियो ।
साधारण सभामा वर्ष भरीको गतिविधिहरूलाई सँगालेर प्रतिवेदन प्रस्तुत गर्नुका साथै आर्थिक प्रतिवेदन समेत सभामा प्रस्तुत गरिएको थियो । सभामा प्रस्तुत गरिएको प्रतिवेदनहरूमा वृहत छलफल हुनुका साथै भावी कार्ययोजनाहरुको विषयमा पनि बहस गरिएको थियो । साधारण सभामा सरोकारवाला पक्षहरूको उत्साह पूर्वक सहभागिता रहेको थियो ।
