दक्षिण कोरिया । नेपाल आदिवासी जनजाति महासंघ (नेफिन) दक्षिण कोरिया जेजुदो शाखाको आयोजना र जातीय संस्थाहरूको सह आयोजनामा ३० औं विश्व आदिवासी दिवस भव्यताका साथ मनाइएको छ ।
गत आइतबार जेजुको केसीटियु हलमा एक भव्य समारोहको आयोजना गर्दै विश्व आदिवासी दिवस मनाइएको हो । रैथाने ज्ञान, संस्कृति र परम्पराहरूको संरक्षण र प्रवर्द्धन आजको आवश्यकता, समानता सह अस्तित्व र पहिचान प्राप्तिको निम्ति आदिवासी जनजातिहरूको एकता भन्ने मूल नाराका साथ आयोजना गरिएको कार्यक्रममा नेपाल आदिवासी जनजाति महासंघ दक्षिण कोरियाका वरिष्ठ उपाध्यक्ष शुभराज भोम्जनको प्रमुख आतिथ्यता रहेको थियो । प्रमुख अतिथि भोम्जनले विश्व आदिवासी दिवसको सन्दर्भ र नेपालमा आदिवासीहरूको इतिहास र आदिवासी आन्दोलनको विषयमा सहभागीहरूलाई प्रस्ट पारिएको थियो । प्रमुख अतिथि भोम्जनले विश्व आदिवासी दिवस मनाउनको लागि सरकारले खर्चको व्यवस्थापन गर्नुपर्ने समेत बताए । आदिवासीहरूको पहिचाननै राज्यको सम्पती रहेको भोम्जनले दाबी गरेको थियो ।
कार्यक्रममा बिभिन्न जातीय समुदायहरुको मौलिक खानेकुराहरूको पूर्ण व्यवस्था रहनुका साथै मौलिक रैथाने गीत सङ्गीतमा सहभागीहरू झुमेको थियो । बिभिन्न जातीय संस्थाहरूले आ आफ्नो मौलिक झाँकी समेत प्रस्तुत गरेको थियो । कार्यक्रममा महासंघ जेजु शाखाका अध्यक्ष गजिन हाङस्रोङको अध्यक्षता रहनुका साथै बिभिन्न जातिय तथा क्षेत्रीय संस्थाहरूको अध्यक्ष तथा प्रतिनिधिहरूको बाक्लो आतिथ्यता रहेको थियो ।
