दक्षिण कोरिया । नजिकिँदै गरेको कोरियन चाड छुसकको अवसरमा शेर्पा संघ दक्षिण कोरियाको आयोजनमा हुन लागेको हिमालयन सांगीतिक धमाका २०२४ मा ख्यातिप्राप्त गायक निमा रुम्बा सहितको कलाकारहरू दक्षिण कोरिया आउने भएका छन् ।
नेपाल आदिवासी जनजाति महासंघ दक्षिण कोरियाको समन्वयमा आयोजना हुन लागेको उक्त कार्यक्रम विपत व्यवस्थापन तथा आपतकालीन राहतकोष स्थापनार्थको मुख्य नारा दिएर आयोजना गर्न लागिएको हो । आइतबार सौलको दोङदेमुनमा आयोजक शेर्पा संघ दक्षिण कोरियाले कार्यक्रमको विषयमा जानकारी गराइएको थियो । कार्यक्रममा गायक निमा रुम्बा, गितारिष्ट सुनिल शाक्य, गायक मिङमा शेर्पा, गायिका समिक्षा अधिकारी, पाल्मु शेर्पा र स्थानीय कलाकारहरूको प्रस्तुती रहने आयोजकले जनाएको छ ।
आइतबार भएको पत्रकार सम्मेलन तथा पोस्टर सार्वजनिक कार्यक्रमको आयोजना गर्दै कार्यक्रम सफल पार्न सहयोग गरिदिनको लागि आयोजकले कोरिया बासी नेपालीहरू माँझ आग्रह गरेका छन् । आयोजकले जनाए अनुसार छुसकको दोश्रो दिन सेप्टेम्बर १७ तारिखमा हुने उक्त कार्यक्रमको प्रवेश शुल्क ३५ हजार कोरियन वन तोकिएको छ । कार्यक्रम सफल पार्नको लागि आदिवासी जनजाति महासंघ सम्बद्ध सम्पूर्ण संस्थाहरूको सहयोग रहेको छ ।
