हेटौंडा/ बागमती प्रदेशमा पहिलो पटक दुई वटा पोल्ट्री फार्मलाई कारबाहीसहित जरिवाना तिराइएको छ । प्रदेशको कृषि तथा पशुपन्छी विकास मन्त्रालयले प्रारम्भिक वातावरणीय परीक्षण प्रतिवेदन स्वीकृत अगावै कानुनविपरीत फार्म सञ्चालनमा ल्याइएकोले ५ लाख रुपैयाँ जरिवाना तिराएको हो ।
कारबाही पर्नेमा भक्तपुरको सुर्यविनायक नगरपालिका–८, स्थित जि.जे पोल्ट्री प्रालि र काभ्रेको पनौती नगरपालिका–६ मा रहेको सफल कृषक ह्याचरी एण्ड ब्रिडिङ फार्म प्रालि रहेका छन् । कृषि मन्त्रालय मातहतको वातावरणीय अध्ययन प्रतिवेदनको जाँचबुझ गरि दाय प्रदान गर्न गठित समितिको सिफारिसमा प्रदेशकै वन तथा वातावरण मन्त्रालयले जरिवाना गराउने निर्णय गरेको हो । समितिले पोल्ट्री फर्मको अनुगमनमा कानुनविपरीत सञ्चालनमा आएको देखिएपछि कारबाहीका लागि कृषि मन्त्रालय हुँदै वन मन्त्रालयमा सिफारिस गरेको थियो । गत १७ भदौमा जिजे पोल्ट्री प्रालिलाई ५ लाख ५ हजार र ६ कात्तिकमा पनौतीको सफल कृषक ह्याचरीलाई ५ लाख १ हजार रुपैयाँ जरिवाना गर्ने वन मन्त्रालयबाट मन्त्रीस्तरीय निर्णय भएको थियो । जरिवाना तिरेकाले जिजे प्रालिको प्रारम्भिक वातावरणीय परीक्षण प्रतिवेदन स्वीकृत भएको र सफल कृषकको स्वीकृतिको चरणमा रहेको कृषि मन्त्रालयले जनाएको छ । वन मन्त्रालयले ७ दिनको म्याद दिएर स्पष्टीकरण माग गरेकोमा दुवै पोल्ट्री फार्मका सञ्चालकले प्रतिवेदन स्वीकृत नगरी आयोजना सञ्चालन गरेको स्वीकार गरेकाले जरिवाना गराउने निर्णय भएको जनाएको छ । जाँचबुझ समितिले स्थलगत निरीक्षण गर्दा काननुविपरीत सञ्चालन गरेको पाइएकाले कारबाही गरिएको कृषि मन्त्रालयका कानुन अधिकृत राजेश तामाङले बताए । सफल कृषक ह्याचरीले प्यारेन्ट कुखुरा पालन र ह्याचिङ युनिट सञ्चालनका लागि र जि.जे पोल्ट्रीले ह्याचिङ युनिट स्तरोन्नती तथा निर्माण कार्य सञ्चालन गर्ने प्रयोजनका लागि वातावरणीय परीक्षण स्वीकृति मागेका थिए ।
