हेटौंडा/ पुरुषको स्वास्थ्यप्रति जनचेतना फैलाउने उद्देश्यले विश्वव्यापी रूपमा आयोजना हुँदै आएको डिस्टिङ्गुइश्ड जेन्टलम्यान्स राइड हेटौंडामा दोस्रो पटक आयोजना हुने भएको छ ।
यो कार्यक्रमको आयोजक हेटौंडा इन्फिल्डर्स मकवानपुर रहेको छ । संस्थाका अध्यक्ष राजक शाहीका अनुसार कार्यक्रम शनिबार बिहान हेटौंडाको मनकामना चोकबाट सुरु हुनेछ र १०० भन्दा बढी मोटरसाइकल यात्रीहरू सहभागी हुने अपेक्षा गरिएको छ। सहभागीहरूले क्लासिक र भिन्टेज स्टाइलका मोटरसाइकल (जस्तै कैफे रेसर, स्क्राम्बलर, बॉबर, रेट्रो मोडर्न बाइक) चढ्नेछन् भने, सुट–टाई, बाउलर ह्याट लगायत ड्यापर फेसनमा सजिएर सहभागिता जनाउने छन् ।
राइडको मुख्य उद्देश्य प्रोस्टेट क्यान्सर र पुरुष मानसिक स्वास्थ्य सम्बन्धी जनचेतना फैलाउनु हो । नेपालमा काठमाडौंलगायत विभिन्न सहरमा आयोजना हुँदै आएको यो कार्यक्रम हेटौंडामा पनि मोटरसाइकलप्रेमी, फेसन उत्साही र सामाजिक चेतनशील व्यक्तिहरूलाई एकैथलोमा ल्याउने प्रयासका रूपमा हेरिएको छ ।
