हेटौंडा / एक समय खानेपानीको अभावले दैनिक जीवन नै कष्टकर बनेको हेटौंडा उपमहानगरपालिका–१४ मा अहिले अधिकांश घरधुरीमा नियमित रूपमा स्वच्छ खानेपानी पुगेको छ । व्यवस्थित वितरण प्रणाली विस्तारसँगै वर्षौँदेखि स्थानीयले भोग्दै आएको खानेपानी समस्या समाधान भएको हो ।
खानेपानीको अभावका कारण ड्राइभरडाँडा, उत्तरपानी, कालापानी र मयुरधापका बासिन्दा टाढाटाढाबाट पानी बोकेर ल्याउन बाध्य थिए। कतिपयले त पर्साको ३ नम्बर पुल क्षेत्रसम्म पुगेर दैनिक उपभोगका लागि पानी ल्याउनुपर्ने अवस्था भोगेका थिए ।
वडा अध्यक्ष दीपक खड्काका अनुसार निर्वाचित भएपछि खानेपानी समस्यालाई पहिलो प्राथमिकतामा राख्दै दीर्घकालीन योजना कार्यान्वयन गरिएको हो। विभिन्न खानेपानी उपभोक्ता समितिलाई एकीकृत गरी हेटौंडा खानेपानी व्यवस्थापन बोर्डमार्फत वितरण प्रणाली सञ्चालनमा ल्याइएपछि समस्या समाधानतर्फ उल्लेखनीय प्रगति भएको उहाँले बताउनुभयो ।
खानेपानी आयोजना विस्तार, नयाँ धारा जडान, पाइपलाइन विस्तार तथा जलस्रोत संरक्षणका कार्यक्रम सञ्चालन गरिएसँगै अहिले अधिकांश घरधुरीमा नियमित रूपमा स्वच्छ खानेपानी उपलब्ध हुन थालेको छ । खानेपानीको अभावका बेला वर्षाको पानी संकलन गर्न सरकारी तथा गैरसरकारी संस्थाले स्थानीयका घरघरमा घ्याम्पो निर्माणसमेत गरिदिएका थिए। अहिले भने घरमै सहज रूपमा खानेपानी उपलब्ध हुन थालेपछि स्थानीयको दैनिकी सहज बनेको छ । वडा कार्यालयले बाँकी रहेका बस्तीमा पनि खानेपानी पूर्वाधार विस्तार गर्दै सुरक्षित र दिगो खानेपानी सेवा सुनिश्चित गर्ने लक्ष्यका साथ कामलाई निरन्तरता दिने जनाएको छ।
