विशाल बस्नेत/ न्युज कारखाना
महोत्तरी, १ कार्तिक । नेकपा एमाले मधेस प्रदेश अधिवेशनको वैधतामाथि प्रश्न नै प्रश्न उठ्न थालेको छ ।
गत असोज २५ र २६ गते भएको अधिवेशनलाई लिएर पाटीभित्रका जिम्मेवार नेताहरूले विधि र प्रक्रियाको विषयमा प्रश्न उठाएका हुन ।
घोषणापत्र तयार गरेर गुपचुप राखेको, अध्यक्ष, उपाध्यक्ष, सचिव, उपसचिवबाहेक अन्य सदस्यहरूमा आफूखुसी गरेको जस्ता आरोप अहिले सतहमा देखिए पछि सो अधिवेशनको वैधानिकतामाथि प्रश्न उठाइएको हो । जिम्मेवार नेता र सदस्यहरूले वैधतामाथि प्रश्न उठाएपछि मदेसमा एमालेभित्रको आन्तरिक विवाद छताछुल्ल भएको छ ।
`न प्रतिवेदन प्रस्तुत गरिएको छ, न आन्तरिक छलफलमा नेताहरूलाई सहभागी गराइएको छ,´ एक जना पूर्व मधेस प्रदेश कमिटी सदस्यले भने, `सबै जनालाई घर पठाई केही नेताहरू बसेर सदस्यहरू टुङ्ग्याए रे भन्ने सुन्ने अवस्था देखा परेको छ ।’
पाटीभित्रका इमानदार र जिम्मेवार नेताहरूलाई पाखा लगाई शीर्ष नेताहरूको नजिक र चाप्लुसी गर्नेलाई मात्रै कमिटीमा ल्याएको प्रदेशस्तरीय नेताहरूको आरोप छ । `यसले पाटीलाई बलियो बनाउनुको सट्टा थप कमजोर बनाउन सक्छ,´ अर्का नेताले भने, ‘पाटीमा कुनै योगदान नै नभएकाहरूलाई सर्वसम्मतको नाम दिएर आफूखुसी गर्नुलाई कसरी मान्नु र ?´
तर अधिवेशनका मुख्य निर्वाचन अधिकृत टिकाध्वज खडकाले पाटीको विधि र प्रक्रियाअनुसार नै अधिवेशन सम्पन्न भएको दाबी गरेका छन् ।
`अब नेताहरू धेरै भएको पाटीमा त्यो खालको केही असन्तुष्टिहरू आउनु स्वाभाविक पनि हो,´ निर्वाचन अधिकृत खडकाले भने,` मनोनीतको नाम बाहेक पाटीवाट सर्वसम्मत भएका सवैजनाको नाम टाँस गरिएको छ ।´ उनका अनुसार अहिले ५ जना पदाधिकारी सहित २३५ जना सदस्यलाई सर्वसम्मत निर्वाचित गरिएको छ । तर, ५ जना पदाधिकारी बाहेक सदस्यहरूमा सर्वसम्मत नभएको असन्तुष्ट नेताहरूको जिकिर छ ।
`बरु हामी निर्वाचन प्रणाली वाट गएको भए मान्थ्यौ तर नेताहरूका नजिक भएका आधारमा मूल्याङ्कन गर्नु त्यो गलत भयो,´ पाटीका अर्का पूर्व मधेस प्रदेश कमिटी सदस्यले भने, `पाटीका लागि नै रगत पसिना भिजाएका साथीहरूको लागी अन्याय भएको छ ।´
नवनिर्वाचित प्रदेश अध्यक्ष चण्डेश्वर मण्डलले भने एमालेभित्र देखिएको असन्तुष्टिलाई छिट्टै समाधान गर्ने बताएका छन् । अधिवेशनमा सदस्य नाम छान्ने क्रममा पनि प्रत्येक जिल्लाका प्रतिनिधिहरुसगँ छुट्टाछुट्टै बैठक बसेर सर्वसम्मतमा नै टुङ्ग्याएको बताउँदै अध्यक्ष मण्डलले छुटेका साथीहरूलाई १० प्रतिशतमा समेट्ने बताए ।
`विधानअनुसार १० प्रतिशत मनोनीत गर्न पाउने व्यवस्था छ,´ उनले भने, `यस वाट पनि केही असन्तुष्टीहरु समाप्त हुनेछन् । उनका अनुसार पाटीले अगाडी सारेको मिसन २०८४ अभियानबाट विचलित नहुने र उद्देश्य प्राप्ति गरेर नै छाडने म्यान्डेट पाएकाले अबको ध्यान त्यतै लगिनेछ ।
उता, पूर्व उपाध्यक्ष रेवती पन्तले विधि र प्रक्रियाअनुसार नै अधिवेशन भएको बताउँदै केही त्रुटि भएको हुनसक्ने बताए । `अब बिस्तारै असन्तुष्टि सेलाएर जान्छ अनि पाटी पुनः चलायमान हुनेछ,´ उनले भने । यद्यपि, पन्त पक्षधरहरूले भने पाटी कै कारण अख्तियारले अधिवेशनको अघिल्लो दिन मुद्दा दायर गरेको आरोप लगाएका छन् ।
पूर्व उपाध्यक्ष समेत रहेका पन्त अध्यक्षको दौडमा थिए । अख्तियारले एक प्रतिष्ठानमा अनियमितता गरेको आरोपमा मुद्दा दायर गरेपछि अध्यक्षको दौडबाट उनी पछाडि हट्न बाध्य भएका थिए ।
