शुभराज भोम्जन
दक्षिण कोरिया । नेपालको राष्ट्रिय पर्व तथा तामाङ समुदायको मौलिक साँस्कृतिक पर्व २८६० डुक ल्हो “सोनाम ल्होछार बृहत साँस्कृतिक कार्यक्रम २०२४” को तयारी अन्तिम चरणमा पुगेको घेदुङ दक्षिण कोरियाका अध्यक्ष राजकुमार स्याङतानले जानकारी दिएका छन् ।
घेदुङ दक्षिण कोरियाले कोरियन पर्व सलनालको पहिलो दिन ०९ फेब्रुअरी २०२४ मा आयोजना गर्ने उक्त बृहत साँस्कृतिक कार्यक्रममा नेपाल देखि अतिथी कलाकारहरुको रुपमा ख्यातिप्राप्त गायक उर्गेन दोङ, सेलो गायिका सुमीना लो र गायिका अनु चौधरीको विशेष सांगीतिक प्रस्तुती रहने छ । सौलको दोङदेमुन नजिकै रहेको एडब्लु कन्भेसन हलमा हुने साँस्कृतिक कार्यक्रमको लागि गर्नु पर्ने थुप्रै तयारीहरु लगभग पुरा भए संगै आयोजकले दक्षिण कोरियामा रहेका समस्त ल्होछार प्रेमीहरुलाई लाबा न्युज मार्फत सार्वजानिक रुपमा सहभागिताको निम्ती विशेष आह्वान समेत गरेका छन् ।
नेपाल तामाङ घेदुङ दक्षिण कोरियाले हरेक वर्ष तामाङ सँस्कृतिलाई जगेर्ना एवम् प्रवर्दन गर्ने हेतुले विशेष साँस्कृतिक कार्यक्रमको आयोजना गरि ल्होछार मनाउदै आईरहेको छ । खानपान सहित हुने उक्त साँस्कृतिक कार्यक्रममा स्थानिय कलाकारहरु गायिका रिचा ब्लोन,नृत्याङ्गना म्युजिक भिडीयो अभिनेतृ प्रतिज्ञा लामा, गायक तथा संगीतकार सुर्य रुम्बा, गायक करप रुम्बा, आशिष मोक्तान, र्यापर दोर्जे जोजो, गायक हस्त तामाङ, पेम्बा तामाङ लगायतका थुप्रै कलाकारहरुको प्रस्तुती रहने छ । विगतको वर्षहरुमा जस्तै यस वर्ष पनि घेदुङको शाखा कार्य समिति बुसान शाखा र जेजुदो शाखाको आयोजनामा पनि सलनालको तेश्रो दिन ११ फेब्रुअरीमा साँस्कृतिक कार्यक्रमको आयोजना गर्दै छ ।
घेदुङ दक्षिण कोरियाले गत वर्ष शैक्षिक कल्याणकारी कोष स्थापना गर्ने उद्धेश्य राखेर आयोजना गरेको कार्यक्रम योजना मुताबिक सफल भएको थियो । गत वर्षको योजना मुताबिक घेदुङ दक्षिण कोरियाले नेपाली १० लाख भन्दा बढी रकमको शैक्षिक कल्याणकारी कोषको स्थापना गरिसकेको छ । यस वर्ष भने आपतकालिन् राहत कोष स्थापना गर्ने उद्धेश्य राखेर कार्यक्रम आयोजना गरिएको छ । गत वर्षझै यस वर्ष पनि कार्यक्रम सफल हुनेमा आफुहरु ढुक्क रहेको सचिव निर योञ्जनले बताए । दिउसो ३ बजेदेखि सुरुहुने उक्त बृहत साँस्कृतिक कार्यक्रम राती १० बजे सम्म हुने छ ।
