शुभराज भोम्जन
दक्षिण कोरिया । नेपाल तामाङ घेदुङ दक्षिण कोरियको आयोजनामा गत फेब्रअरी ०९ मा सम्पन्न भएको सोनाम ल्होछार बृहत साँस्कृतिक कार्यक्रमको आयव्यय सार्वजनिक तथा सम्मान एबम् समिक्षा कार्यक्रम अप्रिल १४ मा गर्ने भएको छ ।
घेदुङले गएको ल्होछारमा प्रस्तुती दिने कलाकार तथा केही सहयोगी दाताहरुलाई सम्मान गर्नुका साथै विविध विषयमा छलफल समेत गरिने जनाएको छ । नेपाल तामाङ घेदुङ दक्षिण कोरियाले हरेक वर्ष तामाङ समुदायको प्रमुख साँस्कृतिक पर्व सोनाम ल्होछारको अवसरमा सामाजिक उद्धेश्य राखेर नेपाल देखि निमन्त्रणा गरेको अतिथी कलाकार र स्थानिय कलाकारहरुको प्रस्तुती रहनेगरी बृहत साँस्कृतिक कार्यक्रमको आयोजना गर्दै आइरहेको छ । घेदुङले गत वर्ष शैक्षिक कल्याणकारी कोष स्थापनार्थ कार्यक्रमको आयोजना गरेको थियो भने यस वर्ष आपतकालिन् राहत कोष स्थापनार्थ बृहत साँस्कृतिक कार्यक्रमको आयोजना गरिएको थियो ।
गत वर्ष ल्होछार कार्यक्रमबाट संकलन भएको फाइदा रकमबाट नेपाली दश लाख भन्दा बढी रकमको शैक्षिक कल्याणकारी कोषको स्थापना गरिसकेको छ । यस वर्ष नेपाल देखि अतिथी कलाकारको रुपमा ख्यातिप्राप्त गायक तथा संगीतकार उर्गेन दोङलाई ल्याउनुका साथै थुप्रै स्थानिय कलाकारहरुको बेजोड प्रस्तुतीको साथमा साँस्कृतिक कार्यक्रम सम्पन्न गरिएको थियो । एच दब्लु कन्भेन्सन हलमा सम्पन्न भएको सोनाम ल्होछार बृहत साँस्कृतिक कार्यक्रममा दक्षिण कोरियामा रहेका ल्होछार प्रेमी दर्शकहरुको बाक्लो सहभागिता रहेको थियो ।
